حیزبی كرێكارانی كوردستان “پ ك ك” لە بارەی قایلبوون بە ئاگربەس لەگەڵ توركیە مەرجەكانی خۆی ڕاگەیاندووە. ئەم مەرجانە بریتین لە چاوەدێریی سەربەخۆ بەسەر ئاگربەسەكەداو ئازادكرانی زیندانییانی سیاسی.
بەپێی ڕاپۆرتی ئێشپیگێل ئانلاین كۆنگرەی کۆما جڤاکێن کوردستان ” KCK”، لقی سیاسیی “پ.ك.ك” ڕوو بە ڕاگەیەنەكانی توركیە ڕایگەیاندووە بێتوو دەوڵەتی ڕەجەب تەیب ئەردۆغان ئامادە بێ دووبارە دەست بە دانووستانەكانی ئاشتی بكاتەوە، ئەوانیش بە ئاگربەس قایل دەبن.
ئەم ڕێكخراوە هەروەها گوتویەتی مەرجی قەبووڵكردنی ئاگربەس چاوەدێریكردنی هێزێكی سەربەخۆ بە سەر ئەم ئاگربەسەو ئازاد كرانی هەموو زیندانییانی سیاسی دەبێ كە لە ماوەی ئەم 2 ساڵەدا ڕاپێچی زیندان كراون.
ئاگربەسی نێوان “پ ك ك” بە سەرۆکایەتیی عەبدوڵڵا ئۆجاڵان كە بۆخۆشی لە زیندان دایەو دەوڵەتی توركیە لە بەهاری ساڵی ٩٢ دەستی پێکرد. ڕەوتی دانووستانەكانی ئاشتی‌و ئەو ئاگربەسە بە هۆی شەڕ و پێكدادانی دوو مانگ لەمەوبەرەوە شێوا و “پ.ك.ك” بۆ جارێكی دیكە بوو بە ئامانجی هێرش‌و پەلاماری ئەرتەشی توركیە.
حیزبی دێمۆكراتیكی گەل “HDP” لەم ماوەیەدا چەندین جار داوای لە هەر دوو لایەن كردووە واز لە شەڕ بێنن‌و ڕوو لە ئاشتی بكەنەوە. ئەم حیزبە هەروەها داوای لەم دوو لایەنە كردووە بگەڕێنەوە سەر مێزی دانووستان و بۆ دۆزینەوەی ڕێگە چارەی ئاشتییانە هەوڵ بدەن.
