ئاگركەوتنەوە لە ٥٠ هێكتار لە لەوەڕگەكانی داوێنی پڕئاو لە كرماشان، زەرەر و زیانێكی زۆری لێ كەوتەوە.
بەپێی ڕاپۆرتی سایتە ناوچەییەكانی كرماشان، لە ئێوارەی ڕۆژی یەكشەممەڕا زیاتر لە ٥٠ هێكتار لە لەوەڕگەكانی بناری پڕئاو بە هۆكارێكی ناڕوون ئاگریان تێبەربووە، ئەم ئاگرە بە هۆی بای توند تەشەنەی كردووەو لە ئەنجامدا پاش ٢ ڕۆژ توانیویانە كۆنتڕۆڵی بكەن.
لەم ڕاپۆرتەدا هەروەها هاتووە كە بە هۆی پەرەسەندنی ئاگركەوتنەوەكە، هێلیكۆپتێرێك بۆ گواستنەوەی هێز نێردراوەتە ئەم بەرزاییە، بەڵام ئەم فڕۆكەیە بە شەو گەیشتۆتە ناوچەكەو هێزەكان نەیانتوانیوە لەم بەرزاییە دابەزن.
كاربەدەستانی پارێزگای كرماشان دەڵێن بوودجەی پێویست بۆ پاراستنی باشتری ژینگەی ئەم پارێزگایە تا ئاستی ١٠ میلیارد تمەن مەزندە كراوە، بەڵام تا ئێستا ئەم پارەیە بۆ ئەو مەبەستە دابین نەکراوە.
