بەڕێز یەکیەتیی لاوانی دێمۆکڕاتی ڕۆژهەڵاتی کوردستان!
پڕ بەدڵ بە بۆنەی ساڵوەگەڕی پێکهاتنی یەکیەتییەکەتان، یەکیەتیی لاوانی دێمۆکڕاتی ڕۆژهەڵاتی کوردستانەوە، پیرۆزباییتان لێ دەکەم.
مێژووی یەکیەتیی لاوان، لە مێژووی لێواولێو لە خەبات و تێکۆشان و تەژی لە ڕووداو و هەوراز و نشێوی حیزبی دێمۆکڕاتی کوردستان جیا نییە و لاوانی کورد لە هەموو قۆناخەکانی خەباتی ڕزگاریخوازانەی نەتەوەکەماندا، بەشی هەرە قورسیان لەسەر شان بووە.
یەکیەتیی لاوان هەر لە سەرەتای پێکهاتنی و بەڕێکخراوبوونی لە “کۆماری کوردستان”دا و تا ئێستاش جێگە و پێگەی دیار و بەرچاوی خۆی لە هەوڵدان بۆ ڕزگاریی کورد و کوردستاندا هەبووە. لە بوارە جۆراوجۆرەکانی خەبات، چ خەباتی پێشمەرگانە و چەکدارانە و چ بواری ڕاگەیاندن، ڕووناکبیری، ڕۆژنامەنووسی و بزووتنەوەی مەدەنی و ئاشتیخوازانەدا، هەمیشە و لە هەموو بارودۆخەکاندا دەوری سەرەکییان گێڕاوە. زیندانەکانی ڕێژیمە دەسەڵاتدارەکانی ئێران هەمیشە لە لاوانی تێکۆشەری کورد جمەی هاتوە، بەشێکی زۆر لە ئیعدامکراوە کوردەکان لە لاوانی ئەم نیشتمانە بوون و هەزاران لاوی تینووی ئازادیی کوردستانیش لە مەیدانەکانی شەڕی چەکدارانە بەرامبەر بە هەردووک ڕێژیمی ستەمکاری پاشایەتی و کۆماری ئیسلامیی ئێران و لە ڕێگای بەرگریکردن لە نەتەوەی کورد و ئامانجە ڕەواکانی ئەو گەلە ستەملێکراوەدا شەهیدبوون.
لەمێژە گوتراوە: “لاوان هیوای دواڕۆژی گەلن”، ئەوەش وتەیەکی ڕاستە و دیارە یەکیەتیی لاوانیش دەبێ ئەو ناوەندە بێ کە دڵ و بیری لاوەکانمان بە خۆشەویستیی نیشتمان و دڵسۆزی بۆ نەتەوەکەمان ڕابێنێ و بۆ قبووڵکردن و بەڕێوەبردنی ئەرک و بەرپرسایەتییەکانیان لە دادێدا پەروەردە و ئامادەیان بکا. ئەو ئەزمونە تا ئێستا ئاکامی دیار و بەرچاوی هەبووە و ڕێکخراوەکانی لاوانی ئێمە مەکۆی پەروەردەبوونی ڕۆڵە تێکۆشەرەکانی نەتەوەکەمان بوون. هەروەک گەورە پیاوی مێژووی کورد شەهید دوکتور قاسملوو، سکرتێری حیزبی دێموکراتی کوردستان و بەشێک لە ئەندامانی بەڕێوبەری و کادر و بەرپرسانی پلەسەرووی حیزبیش لە ڕیزەکانی یەکییەتی لاوانەوە خەباتی خۆیان دەست پێکردوە، پێگەیشتوون و دواتر بەرپرسایەتیی گەورەیان لە حیزبی دێمۆکڕاتی کوردستاندا بەئەستۆوە گرتوە.
لە کۆتاییدا جارێکی دیکەش بەم بۆنەیەوە پیرۆزباییتان لێ دەکەم، هیوادارم یەکیەتیی لاوانی ڕۆژهەڵاتی کوردستان لە ڕێگای جێبەجێکردنی ئەرکەکانی و پەردوەردەکردنی لاوانی کورددا هەر سەرکەوتوو بێ و لەشساغی و دواڕۆژێکی درەوشاوە و شادییش بۆ هەموو لاوانی نیشتمانەکەمان بە ئاوات دەخوازم.
مستەفا مەولوودی
سکرتێری گشتیی حیزبی دێموکراتی کوردستان
٢٢ /1/١٣٩٨ی هەتاوی
