گەڵاڵەی پالێرمۆ کە ماوەیەکە لەنێو دامەزراوەکانی ڕێژیمدا بۆتە جێگەی باس و مشتومڕی کاربەدەستان، گرفتی گەورەی خستۆتە بەردەم دەوڵەتی ڕوحانی و لایەنەکان لەسەر پەسەند کردن یا پەسەند نەکردنی تووشی ناکۆکی بوون. ئیسلاح تەڵەبەکان لەسەر پەسەندکردنی هاوڕان و بناژۆخوازەکانیش هەموویان لەسەر پەسەند کردنی کۆک نین.
چەند ڕۆژ لەمەوبەر حەسەنی ڕووحانی سەرۆک کۆماری ئێران بە نیگەرانییەوە باسی لە پەسەند کردنی ئەو گەڵالەیە کرد و ڕایگەیاند کە ئێران لە دەست ٢٠ کەس دایە کە مەبەستی کۆڕی هەڵسەنگاندنی بەرژەوەندییەکانی نیزام و بەشیک لە ئەندامانی شورای نیگابان بوو. ناوبراو گوتی: لە کاتێکدا کە ڕێبەر دەڵێ من هیچ کێشەیەکم لەگەڵ پەسەند کردنی ئەو گەڵالەیە نییە، نازانم هێندێک کەس بە نیازی چین.
لە کاتی پەسەند کردنی ئەو گەڵاڵەیەدا ئێران دەتوانێ پێوەندییە بانکییەکانی درێژە پێبدا و بانکی ناوەندیی ئێران بە بانکە جیهانییەکان ببستێتەوە، بەڵام هەر لەو کاتەدا پەسەند کردنی زیانێکی گەورە بە ئامانجە بناژۆخواز و تێرۆریستییەکانی ڕێژیم دەگەیەنێ. ڕیژیم کۆماری ئیسلامیی ئێران کە سەرچاوەی ئاژاوەیە لە ناوچەکەدا و ماکەی تێرۆریزمی نێودەوڵەتییە، دوای پەسەند کردنی ئەو گەڵالەیە ئیتر ناتوانێ پشتیوانی لەو گرووپ و میلیشیا تێرۆریستیانە بکا کە لە لیستی تێرۆر دان. ڕێژیمی کۆماری ئیسلامی ئێران لە ماوەی ئەو چل ساڵەدا پشتیوانی ئەسڵی تێرۆریزم بووە لە جیهاندا و گەورەترین ڕێکخراوی تێرۆریستی ناچەکە کە حیزبوڵڵای لوبنانە، لەلایەن کۆماری ئیسلامییەوە پشتیوانی لێدەکرێ و بە سەروەت و سامانی خەڵکی ئێران پێداویستییەکانی شەڕ و تێرۆری بۆ دابین دەکا.
سپی کردنەوەی پارە واتە پارەی ڕەش کە یەکێکی تر لە سەرچاوەکانی داهاتی کۆماری ئیسلامیین و لەو ڕێگەیەوە پارەیەکی زۆر دێتە سەر حیسابی سپای پاسداران و سپای قودس و پێداویستییەکانی گرووپە توندئاژۆ و تێرۆریستییەکانی پێ دابین دەکرێ، دوای پەسەند کردنی ئەو گەڵاڵەیە ئەو ڕێگەیەشی لێدەبەسترێ و دەستی کورت دەکرێتەوە و ناتوانێ بە کەیفی خۆی لە ناوچەکەدا تەڕاتێن بکا.
لە کاتی پەسەند نەکردنی گەڵای پالێرمۆدا، کۆماری ئیسلامی کە ئەندامەتییەکەی لەو ڕێکخراوە جیهانییەدا بۆ سێ مانگی تر هەڵپەسێردراوە، دەکەوێتە نێو لیستی ڕەش و بانکە جیهانییەکان مامەڵە و ئاڵوگۆڕی پارە لەگەڵ بانکی ناوەندیی ئێران ناکەن و ئەوەش دەبێتە هۆی داڕمانی ئابووری ئێران و زیانێکی گەورە بەو وڵاتە دەگەیەنێ.
