بەردەوامیی پرسەو سەرەخۆشیی کاک ڕەحمان عەزیزی

لە بنکەی دەفتەری سیاسی‌و هەروەها لە شاری نەغەدە پرسەو سەرەخۆشیی کاک رەحمان عەزیزی بەڕدەوام بووە.
دوای مەرگی کاک ڕەحمان عەزیزی، باوکی کاک خالید عەزیزی، سکرتێری گشتیی حیزبی دێموکڕاتی کوردستان شەپۆلێکی بەرینی هاوخەمی لەگەڵ بەڕێزیان‌و بنەماڵەکەیان وەڕێ کەوتوە.
بەپێی ڕاپۆرتی کوردستان‌و کورد لە درێژەی ئەو هاوخەمییەدا نوێنەرانی حیزبە سیاسییەکانی باشووری کوردستان، کەسایەتییە سیاسی، فەرهەنگی‌، ئەدەبی‌و ڕووناکبیرییەکانی کوردستان سەردانی سکرتاریای حیزبی دێموکڕاتی کوردستانیان کردوەو لە نیزیکەوە هاوخەمیی خۆیان لەگەڵ کاک خالید عەزیزی، سکرتیری گشتیی حیزبی دێموکڕاتی کوردستان دەربڕیوە.
لە شاری نەغەدەش لە مزگەوتی ئەمیر حوسێنی بۆ ماوەی دوو ڕۆژ پرسەو سەرەخۆشیی کاک ڕەحمان عەزیزی بەڕێوەچووە.
بەپێی ڕاپۆرتی پەیامنێری کوردستان‌و کورد لە زۆربەی شارو ناوچەکانی کوردستان، لە شنۆو نەغەدە، پیرانشارو سەردەشت، بانەو سەقز، سنەو مەریوان، بۆکان‌و مەهاباد، کامیاران‌و کرماشان‌و ورمێ‌و زۆر شارو ناوچەی دیکەی کوردستان پۆل پۆل خەڵک ڕوویان لە نەغەدە کردوە‌و لە نیزیکەوە هاوخەمیی خۆیان بەبۆنەی مەرگی کاک ڕەحمان عەزیزی؛ لەگەڵ بنەماڵەی بەڕێزی دەربڕیوە.
جێی بیرهێنانەوەیە کە کاک ڕەحمانی عەزیزی، ناسراو بە ڕەحمانی ھەمزەی‌؛ کەسایەتیی دلسۆزو نیشتیمانپەروەرو خۆشناوی ناوچه‌ی نه‌غه‌ده‌و باوکی کاك خالیدی عەزیزی سکرتێری گشتیی حیزبی دێموکڕاتی کوردستان رۆژی یەک شەممە،١١ی گەلاویژ کۆچی دوایی کرد.