چوونەسەری نرخی ماشێن و کەلوپەل و پێداویستیەکانی ژیانی خەڵک لە ئێران رۆژبەڕۆژ لە بەرزبوونەوە دایە و حکوومەتی ئێران لەبەرانبەر گرانی و چوونە سەری نرخەکان دەستەوەستانە و پلان و بەرنامەکانی بۆ پێشگرتن لە گرانی وەڵامدەری دۆخی ئێستای بازاڕ نین.
لەگەڵ چوونە سەری نرخەکان، لە ماوی دووڕۆژدا نرخی ماشینی “پڕاید ١١١” لە ٤٥ میلیۆنەوە گەیشتە ٤٧ میلیۆن تمەن و لە ماوەی دوو ڕۆژدا دوو میلیۆن تمەن چۆتە سەر.
دیارە چوونە سەری نرخەکان بۆ جۆری ماشێنەکانی دیکەش هەر بەو شیوەیە. نرخی “پێژۆ” ٤ میلیۆن تمەن نرخەکەی زیادی کردووە و بۆتە ٨٠ میلیۆن تمەن.
ئاڵۆزی بازاڕی ئێران بەجۆرێکە کە حکوومەت توانای کۆنتڕۆڵکردنی نییە و خەڵک بە نیگەرانییەوە سەیری چوونە سەری نرخ و جیاوازیی نرخەکان دەکەن.
لە کاتێکدا کە نرخی ماشینی پێژۆ لە کۆمپانیا بە ٤٢ میلیۆن تمەنە بەڵام لە بازاڕ بە ٧٦ میلیۆن تمەن دەفرۆشێ. نرخی ماشینی “سەمەند ئال ئیکس” لە کۆمپانیا بە ٤٣ میلیۆن تمەنە بەڵام لە بازار گەیشتۆتە ٨٠ میلیۆن تمەن.
ڕەزا ڕەحمانی وەزیری پیشەسازی کانزا و بازرگانی ڕایگەیاند کە گرانی هیچ پێوەندییەکی بە فۆرمۆلی بەڕێوەبەریی ئەو وەزارەتەوە نییە. ناوبراو گوتی: تەنیا ڕێگا چارەی کەمکردنەوەی نرخەکان بردنەسەر و پەرپێدانی بەرهەمهێنانە.
سەعید موتمنی بەڕێوەبەریی یەکیەتی فرۆشیاران، چوونە سەری نرخەکانی گەڕاندەوە بۆ کەمی بەرهەمهێنانی ماشێن و ڕەوانە کردنیانە بۆ بازاڕ کە ئەوەش بۆتە هۆی سەرلێشێواوی و چوونە سەری نرخی ماشێن لە بازاڕدا.
ناوبراو گوتی لە کاتێکدا کە نرخی ماشێنەکانی ٢٠٦ کە ١٠ ڕۆژ پێش ٥٩ میلیۆن تمەن بوو، ئێستا نرخەکەی گەیشتۆتە ٧٦ میلیۆن تمەن.
کەمبوونەوەی بەرهەمهێنانی ماشێن لە کاتێکدا بەشێوەیەکی بەرچاو دەرکەوت کە دەوری دووهەمی گەمارۆکانی ئەمریکا بۆ سەر ئێران دەستی پێکرد. لە کاتێکدا بەرپرسانی حکوومەت دەڵێن کە گەمارۆکان هیچ کاریگەریەکیان لە سەر بازاڕی ئێران نییە، بەڵام بە کردەوە دەرکەوتوە کە لە ماوەیەکی کورتدا و لەگەڵ ئەوەی کە جارێ هەموو گەمارۆکان نەچوونە بواری جێبەجیکردنەوە، بەڵام بەشێوەیەکی بەرچاو و حاشاهەڵنەگر گرانی ڕووی لە بازارەکانی ئێران کردووە و کاربەدەستانی ڕێژیمیش بێجگە لە دروشم و فریودانی خەڵک و بیروڕای گشتیی جیهان، هیچ بەرنامە و پلانێکی گونجاویان نییە بۆ چارەسەری ئەو دۆخە نالەبارە و دەربازبوون لەو قەیران و ئاڵۆزیانە.