لە ماوەی ئەمساڵدا ئاگركەوتنەوەی بەربڵاو لە دارستانەكانی پارێزگای ئیلام ڕووی داوە بە جۆرێك كە تا ئێستا لە ٤١ حاڵەتی ئاگركەوتنەوەدا ١٢١١ هێكتار لە لێڕەوا و لەوەڕگەكانی بناری زاگرۆس لە بڵێسەی ئاگردا سووتاون‌و بوون بە خەڵووز.
بەپێی ڕاپۆرتە بڵاوکراوەکان لەو پێوەندییەدا لێڕەوارەكانی “شلم”، “مانێشت” و “قلارنگ” لە شاری سیروان، دیناركێو لە ئابدانان، دێهلۆران، چوار، بەدرەو، ئەیوان، بە بەردەوامی لە جەهەنەمی ئاگردا سووتان‌و لەنێو چوون.
بەپێی زانیارییەکان لە هێندێك لە حاڵەتەكانی ئاگركەوتنەوەی دارستانەكانی پارێزگای ئیلامدا هۆكارە مرۆییەكان هۆی سەرەكی بوون‌و لەم نێوەدا لاواز بوونی ژێرخانەكانی پارێزگای ئیلام‌و نەبوونی ئیمكانات وەك هێلیکۆپتێری تایبەت بە ئاگرکوژێنەوە بوو بە هۆی ئەوەی كە ئاگرەكە زیاتر تەشەنە بكاو ڕوودانی هەر حاڵەتێكی لەم چەشنە تا چەند ڕۆژ كۆنتڕۆڵ نەكراوەو بەوەش پانتایی زیانەکان زۆر زیاتر بوون.
چالاکانی ژینگەپارێزی ئیلام دەڵێن سەرەڕای هەموو ئەو زیان‌و خەسارە گەورانەی بەر سروشتی ئیلام کەوتوە، بەڵا، كاربەدەستانی شارو پارێزگا ئاوڕێكی ئەوتۆیان لەم گرفتە جیددییەی پارێزگای ئیلام نەداوەتەوەو لە ئاگركەوتنەوەكانی ئەم دواییانەدا بیندراوە كە پاش ئاگركەوتنەوەی بەربڵاو ستادی قەیرانی پارێزگا زۆر بە كاوەخۆ داوای هێلیکۆپتێری ئاگرکوژێنەوەی كردووەو تا ئەم فڕۆكەیەش لە تارانەوە بگاتە ئیلام كاتێكی زۆر بە فیڕۆ چووەو بەشێكی زۆر لە دارستانەكانی ئەم دەڤەرە بۆتە سووتمان.
جێی باسە پانتایی لێڕەوارەكانی پارێزگای ئیلام ٦٤٠ هەزار هێكتارەو نزیكەی سەدی ٩٠ی ئەم دارستانانە لە داربەڕوو پێك هاتووە كە ١٧٠ هەزار هێكتاری ئەم لێڕەوارە کەوتوونەتە بارودۆخی قەیرانەوە.
