ناچالاكبوونی سەدی ٩٠ی ژنانی ئێران لە بواری ئابوورییەوە

جێگری سەركۆماری ئێران بۆ كاروباری ژنان‌و بنەماڵە دەڵێ كە بەپێی ئامارەكان سەدی ٨٧ی ژنان لە بواری ئابوورییەوە ناچالاكن.
بەپێی ئامارێكی دیكە كە بەم زووانە بڵاوكراوەتەوەو لەگەڵ ئاماری خاتوو شەهێندوخت مەولاوێردی لێک دەچن، نرخی بەشداریی ئابووریی پیاوان لە ساڵی ڕابردوودا سەدی ٦٧ ، بە واتایەكی دیكە زیاتر لە ٥ بەرابەری ژنان بووە.
بەپێی قسەكانی شەهێندوخت مەولاوێردی‌و بەپێی ئاكامی سەرژمێریی ساڵی ١٣٩٠ لە نێو ژنانی سەرووی ١٠ ساڵ‌دا، سەدی ١٠ی ئەوان کاریان بووە، سەدی ٦/٢ یان بێکار بوون‌و بەدوای كاردا گەڕاون‌و، سەدی ٢٠ خوێندكار بوون‌و، سەدی ٦١ی دیکەیان خەریکی ماڵداری بوون.
جێگری كاروباری ژنان لە دەوڵەتی ئێران لە پێوەندیی گیروگرفتی ژنانی ئێران لە بواری بەشداریی ژنان لە ئابووری دەڵێ، ژنان لەگەڵ کۆمەڵە کێشەو ئاستەنگێکی وەك بەرابەریی ماف‌و هەقدەست، ئەمنیەتی كاری‌و گرینگتر لە هەمووان هاوسەنگی‌ڕاگرتن لە بەرپرسایەتیی كار و بنەماڵە ڕووبەڕوون و جگە لەمانە كەلێنی ڕەگەزایەتی لە بازاڕی كارە کە زیاتر لە هەموو شتێك دەردەكەوێ.
شایانی باسە كە لە مێژە دەرگاكانی كار لەسەر ژنان داخراون‌و بە هۆی نەبوونی هەلی كاریی جۆراوجۆرو ئاماری بەرزی بێكاری، ژنان و لاوان زیاتر لە توێژەكانی دیكەی كۆمەڵگە لە سەرووی بێ هیواكان بۆ بەشداری كردن لە ئابووریی ئێران دان.
سەرەڕای ئەوەش كە چەند دەیەیە كە زانكۆكانی ئێران گەشەیان كردوەو ڕێژەی ژنانی خوێندەوار بەرزبۆتەوە، بارودۆخی شوغڵی ژنان باشتر نەبووەو بە پێچەوانە بە بەرزبوونەوەی ئاماری خوێندەوارانی زانكۆ، ئاماری بێكاری لە ژناندا زیاتر بووەو لە سەدی ٤٠ تێپەڕیوە.