زیانی ڕەشەباو بارانی بێ‌وەخت لە سەردەشت‌و ئیلام

شەپۆلی باران‌ بارینی بێ‌وەخت‌و ڕەشەبا کە لە ماوەی چەند ڕۆژی ڕابردوودا زۆربەی شارو ناوچەکانی کوردستان‌و ئێرانی گرتۆتەوە، ڕۆژی چوارشەممە گەیشتە سەردەشت.
بەپێی ڕاپۆرتی پەیامنیری کوردستان‌و کورد باران، زریان‌و رەشەبا لە شاری سەردەشت زیانی زۆری لە خەڵک داوەو بەهۆی شکاندن‌و هەڵکەندنی دارو بەربوونەوەی بەسەر ماشێنی خەڵکدا زیانێکی زۆر بەر خەڵکی کەوتوەو هەروەها لە زۆر جێدا رێگەبەندانی دروست کردوە.
هەروەها بە هۆی باران بارینی زۆر لە پارێزگای ئیلام لە زۆربەی شارەكانی ئەو پارێزگا سێڵاو هەستاوە.
ئەو سێڵاوە دێهاتی “ئابین”و “بەوڵك”و لە شاری “مەلکشاهی باران بارینی زۆر بووه هۆى هەستانی سێڵاوو ئەو لافاوە زیان‌و زەرەرێکی زۆری بە زەوییە کشتوکاڵییەکانی ئەو دوو ئاواییە گەیاندوە.
شایانی باسە لە حاڵێكدا كاربەدەستانی ڕێكخراوی مانگی سوورو پزیشكیی قانوونی لە ئێران پێشتریش باسیان لە زیان بەرکەوتنی ٢٩ شارو مردنی لانی كەم ١٨ كەس بەهۆی هەستانی لافاو لەم حەوتوویە لە ٩ پارێزگای ئێراندا كردووە، بەڵام سەرۆكی ستادی قەیرانی ئێران دەڵێ پێویست نەبوو ئەو ڕووداوانە لەو ئاستەدا بە میدیایی بکرێن‌و قوولایی ئەم ڕووداوانە لە ئاستی شارێكی بچووكیش‌دا نەبووە و نابی ئاوا گەورەی بكەنەوە.