دوابەدوای داکۆکیی یەکێک لە بەرپرسانی وەزارەتی دەرەوەی ئێران لە قسەکانی “محەممەد جەواد زەریف” لە سەر سپیکردنەوەی دراو لە ئێران، “حەمید بەعیدی نژاد” باڵیۆزی ئێران لە لەندەن ئەو قسانەی “زەریف”ی پشتڕاستکردەوە و ڕایگەیاند کە بەرپرسانی ئێرانی دەمێکە زانیارییان لە سەر سپیکردنەوەی دراو لەو وڵاتە هەیە.
“بەعیدی نژاد” لە تویتێک دا ڕایگەیاند کە: بەرپرسانی پێوەندیدار ساڵانێکە چاودێری سپیکردنەوەی دراو دەکەن و، زانیاریی تەواویان لە سەر ڕادەی سوودی نایاسایی سپیکردنەوەی دراو هەیە کە ساڵانە دەچێتە بازاڕی ئابووریی ئێران.
ناوبراو ڕایگەیاند کە ساڵانە ٣ میلیارد دۆلار ماددەی هۆشبەر، دروا و کەلوپەل ١٢.٦ میلیارد دۆلار و ٤٠ میلیۆن لیترسووتەمەنی لە ڕۆژدا بە قاچاغ و نایاسایی مامەڵەی پێوە دەکرێ.
شایانی باسە دوای ئەوەی کە “محەممەد جەواد زەریف” وەزیری دەرەوەی ئێران باسی سپیکردنەوەی پارەی لە ئێران هێنایە گۆڕێ، توندئاژۆکان و دەزگای دادوەریی ئێران دژایەتی توندی خۆیان بە قسەکانی “زەریف” ڕاگەیاند.
کاربەدەستانی دەسەڵاتی دادوەری، داوایان لە وەزیری دەرەوەی ئێران کرد کە لەو بارەوە بەڵگەکانی خۆی بخاتە ڕوو.
هەر لەو پێوەندییەدا کۆمەڵێک لە ئەندامانی “جەبهەی پایەداری” خەریکی واژۆ کۆکردنەوەن بۆ لێپێچینەوە لەناوبراو.
شایانی باسە کە ڕۆژی سێشەممەی ڕابردوو، “مورتەزا سەرمەدی” قایمقامی وەزارەتی دەررەی ئێران، بۆ داکۆکی لە “محەممەد جەواد زەریف” ڕایگەیاند کە “بەپێی ئەوە ئامارەی کە لەبەردەست دایە، لانیکەم ١٠ تا ١٥ میلیارد دۆلار لە ئێراندا پارە سپیدەکرێتەوە”.
جێی ئاماژەیە کە چەند ڕۆژ لەمەوبەر، وەزیری دەرەوەی ئێران ڕایگەیاند کە ساڵانێکە سپیکردنەوەی پارە لە ئێراندا بوونی هەیە و شتێک نیە کە حاشای لێبکرێ.
قسەکانی “زەریف” لە پێوەندی لە گەڵ سپیکردنەوەی دراو، یەکەمین جارە کە لە زمان کاربەدەستێکی پایەبەرزی کۆماری ئیسلامیی ئێرانەوە باس دەکرێ.
دەزگای دادوەریی کۆماری ئیسلامی زۆر زوو دژکردەوەی نیشاندا و “موحسن ئێژەئی” داوای کرد کە محەممەد جەواد زەریف لەو بارە بەڵگەکانی خۆی بخاتە ڕوو و نوێنەرانی مەجلیس خەریکی ئامادەکردنی گەڵالەیەکن بۆ ئەوەی کە “زەریف” بانگهێشتی دانیشتنی مەجلیس بکەن هەتا لە سەر ئەو قسانەی ڕوونکردنەوە بدات و لێپێچینەوەی لەگەڵ بکرێ.
