مەلاقادر قادری پێشنوێژ و نوێنەری خامنەیی لە شاری پاوە، بۆ جارێکی دیکە فستیڤاڵی هەنار و گەورەترین فستیڤاڵی ئایینی ، کە بڕیاربوو لە رۆژی ٢٦ی خەزەڵوەر لە هوتێل پارسیانی کرماشان بۆ ماوەی ٤ رۆژ بەڕێوەبچێت، هەڵوەشاندەوە.
بەپێی ڕاپۆڕتێک کە لە کرماشانەوە بە دەستمان گەیشتووە، سەرەڕای ئەوەی کە چالاکان و هونەرمەندانی کرماشان بە ڕێگەپێدراوی لە لایەن ئوستانداری کرماشان و ئیدارەی میراتی فەرهەنگی ئەو پارێزگایە، خەریکی ئامادەکاریی بۆ بەڕێوەبردنی فستیڤاڵی کەلتووری “هەنار” بوون، بەڵام بە بڕیاری پێشنوێژی شاری پاوە، ئەو فستیڤاڵە هەڵوەشاوەتەوە.
بە پێی هەمان سەرچاوە، کۆمەڵێک هونەرمەندی دەفژەن و تەموورەژەن لە دوو پارێزگای کرماشان و سنە بۆ ئەو فستیڤاڵە بانگهێشت کرابوون، بەڵام مەلا قادر قادری ، بە هاوکاری سپای پاسداران ئەو فستیڤاڵەیان هەڵوەشاندوتەوە.
جێیوەبیرهێنانەوەیە ماوەیەک لەمەوپێش ١٨ی خەزەڵوەر کە بڕیار بوو لە شارۆچکەی بایەنگان ڕێوڕەسمی ساڵانەی “هەنار” بەڕێوەبچێ ، بەڵام مەلاقادر و ماڵپەرەکانی سەر بە بناژۆخوازانی ڕێژیم دەستیان کردە هێرش کردن بۆ سەر بەڕێوەبەرانی ئەو ڕێوڕەسمەو بە توندی ڕەخنەیان لەو جێژنە مێژووییە گرت و هەر ئەمەش بۆ بە هۆکارێک کە ئەو ڕێوڕەسمە لە لایەن ناوەندە ئەمنییەکانەوە هەڵبوەشێتەوە.