ڕۆژی هەینی ڕێکەوتی ٩ی نۆڤامبری ٢٠١٨ی زایینی، لە ناو خەمی و پەژارەی سەدان کەس لە بنەماڵە و خزمان، هاوڕێ و هاوکارانی و کۆمەڵێکی بەرچاو لە ئەندامانی حیزبی دیموکراتی کوردستان لە وڵاتی سوید و وڵاتانی دەورووبەر، تەرمی هاوڕێ مغدید مێهرفام ناسراو بە ” حەمید” لە گۆڕستانی کڤیبێری شاری یۆتێبۆری وڵاتی سوید بە خاک سپێردرا. پێش ئەسپەردە کردنی تەرمی کاک حەمید، لە ساڵۆنی ماتەمینی گۆڕستانەکە ڕێوڕەسمی بەڕێکردن بەڕێوەچوو. ئەو ڕێوڕەسمە بە وتەی سەرەتای یەکێک لە نزیکترین هاوڕێیان بە ناوی دکتور عەزیز قادری ناسراو بە ” مام عەزیز ” دەستی پێکرد. بەڕێز مام عەزیز کە یەکێک لە دۆستە نزیکەکانی کاک حەمید بوو، باسێکی تێروتەسەلی سەبارەت بە کەسایەتی کۆچکردوو و پاشان ڕۆژانی سەرەتای دەستپێکی خەباتی و تەڤلی بوونی بە شۆڕشی ڕزگاری نەتەوەیی گەلەکەمان و پەرەوازە بوون و لە ئێران و پاشان گیرسانەوە لە وڵاتی سوید پێشکەش کرد. بەڕێز مام عەزیزی باسی لە گەورەیی و خاوەن هەڵوێستی ئەو ڕۆڵە بەئەمەگەی گەلەکەمان و بنەماڵەکەی کرد. بە دوای ئەو دا هاوڕێ ئەسعەدی یوسفی، دۆستی دێرینی کاک مغدید چەند وتەیەکی بە زمانی سوید پێشکەشی ئامادە بووان کرد. پاش ئەو ڕێورەسمە تەرمی هاوڕێ مغدیدی بەرەو گۆڕستان بەڕێ کرا.
کاتژمێر ١ی پاشنیوەڕۆی هەمان ڕۆژ لە یەکێک لە ساڵۆنەکانی شاری یۆتێبۆری ڕێوڕەسمێکی گەورە بە بەشداری سەدان کەس لە کوردانی دانیشتووی شاری یۆتێبۆری، نوێنەری حیزب و ڕێکخراوە کوردستانییەکان و هاوڕێ و دۆست و خزمانی ڕێکخرا. ڕوڕەسمە ەبە وتەی بەخێرهێنانی ماتەمگێڕان لە لایەن هاوڕێ نەبەز عەلیدووست و سروودی نەتەوەیەتی ئەی رەقیب دەستی پێکرد. پاشان هاوڕێ جەلال بەهلوول زادە، بەرپرسی کومیتەی حیزبی دیموکراتی کوردستان لە شاری یۆتێبۆری پەیامی هاوخەمی کومیتەی یۆتێبۆری حیزبی پێشکەش کرد.
بە دوای ئەو دا کاک حەمەرەسووڵ کەریمی ئەندامی ڕێبەری حیزبی دیموکراتی کوردستان، پەیامی سەرەخۆشی کومیتەی دەرەوەی وڵاتی حیزبی دیموکراتی کوردستانی بە بنەماڵە و ئامادە بووانی ئەو کۆڕیادە کرد. هاوڕێ حەمەڕەسووڵ کەریمی لە وتەکانی دا باسی لە دڵسۆزی، لێهاتووی و هەڵویستی کوردانەی کاک حەمید کرد و لەدەست چوونی ئەو ڕۆلە تێکۆشەرەی گەلەکەمانی بە خەسارێکی گەورە بۆ کورد و حیزبەکەمان دایە قەلەم.
بە دوای ئەو دا بەڕێز کاک براییم لاجانی خزمی نزیکی کاک مغدید، پەیامی بنەماڵەی پێشکەش کرد. بەڕێز براییم لاجانی لە وتەکانی دا سپاسی هەموو ئەو کەسانەی کرد کە لە ماوە جەند ڕۆژ نەخۆشی و جێگیر بوونی کاک مغدید لە نەخۆشخانە، پێوەی ماندوو بوون و هاودەرد و هاوخەمییان بوون. بەڕێز لاجانی سپاسی کومیتەی حیزبی دیموکراتی کوردستان کرد کە لە هیچ هاوکارییەک بە کاک حەمید و بمەڵەکەی درێغیان نەکرد. ئینجا ژیاننامەی کاک حەمید بە زمانی سویدی لە لایەن کێژووڵەی لاوی کورد خاتوو دەریا ئەنوەری،یەوە خوێندرایەوە. بە دوای ئەو دا بەڕێزی کاک ئەحمەد لبادی هاوڕێ و دۆستی نزیکی کاک مەغدید چەند وتەیەکی سەبارەت بە کەسایەتی بەرزی کاک حەمید و خوو ڕەوەشتە جوانەکانی هێنایە زمان. ئینجا برایەکی کاک مغدید لە ڕێگەی تۆڕەکۆمەڵایەتییەکانەوە سپاسی خۆی و هەموو ئەندامانی بنەماڵەکەیانی پێشکەشی ئامادەبووانی کۆڕیادە کرد.
دیانا تاقانە کچی کاکە مغدید چەند وتەیەکی بە زمانی سویدی کە هەڵگری هەستی پڕ لە سۆزی ئەو بوو بۆ باوکی ئازیزی هێنایە زمان و خەم و پەژارەی خۆی بۆ لە دەست دانی باوکی خۆشەویستی نیشان دا. لە بەشێکی دیکەی ئەو کۆڕیادە دە ابەڕێز ئاکۆ ئەنوەری پەیامی کۆمەڵە- ڕیکخراوی کوردستانی حیزبی کمونسیتی ئێرانی پێشکەش کرد.
هونەرمەندی دەنگ خۆش فەریبۆرز کەرەمی مەقام و گۆرانییەکی پڕ لە سۆز و لاوانەوەی بە زاراوەی لوڕی و لەکی و بە هاوئاهەنگی سێتارەکەی دەستی بۆ خەمی لە دەست دانی کاکە مەغدید پێشکەش کرد، ئینجا مەقامی پاییزی حەمە ساڵح دیلان بە دەنگیپڕ لە سۆزی کاک جەمال فەتحیان و بە هاوکاری کاک فەریبوورز کەرمی بڕگەیەکی دیکەی ئەو کۆڕیادە بوو. بە دوای ئەواندا برووسکەی ماتەمینی کۆمەڵەی زەحمەتکێشانی کوردستان خوێندرایەوە. ئینجا هاوڕێ ساماڵ پەیامی هاودەردی وهاوخەمی حیزبی شیۆعی کوردستانی گەیاندە بنەماڵە و کەس و کاری کاک مەغدید.
لە بەشێکی دیکەی ئەو کۆڕیاد دا پەیامی کومیتەی ڕێکخستنی ی ن ک و خاتوو لەیلال زارعی خوێندرانەوە و خاتوونێکی بە ناوی سەعدی هەستی خۆی بۆ مەرگی نابەوەختی کاک مغدید دەربڕی.
لە کۆتایی ئەو کۆڕیادە دا خاتوو گوڵنار هاوسەری هاوڕێی کۆچکردوومان مغدید مێهرفام لە چەند وتەیەک دا سپاسی هەموو ئەو کەسانەی کرد کە بە درێژایی ئەو چەند ڕۆژە پێیانەوە هیلاک بوون و لە نزیکەوە لەگەڵیان بوون. هەروەها سپاسی هەموو ئەو کەسانەی کرد کە لەو کۆڕیادە دا و لە ڕێگەی تەلەفوون و تۆڕە کۆمەڵایەتییەکانەوە هاودەردی خۆیان بە بۆنەی مەرگی ئەو ئازیزەیانەوە دەربڕیوە.
پێویست بە ئاماژەیە کە هاوڕێ مغدید مێهرفام ڕۆژی پێنجشەممە ڕێکەوتی ١ی نۆڤامبری
٢٠١٨ی زایینی، بە هۆی سەکتەی دڵ و پاش چەند ڕۆژ بەربەرەکانێ لەگەڵ مەرگ، لە یەکێک نەخۆشخانەکانی شاری یۆتێبۆری وڵاتی سوید کۆچی دوایی کرد ماڵئاوایی لە گەل و نیشتمانەکەمان کرد
