دەوڵەتی “لوبنان” پێدانی سووتەمەنی بە فڕۆکەکانی ئێرانی قەدەغەکرد و بە کۆمپانیا نەوتییەکانی ئەو وڵاتەی لە فڕۆکەخانەی نێودەوڵەتی “ڕەفیق حەریری”ڕاگەیاند کە ئیتر نابێ سووتەمەنی بە فڕۆکە ئێرانییەکان بدرێ.
بەپێی ڕاپۆرتی “ئۆریەنت”ی سەربە ئۆپۆزیسیۆنی “سووریە” کۆمپانیا نەوتییەکانی لوبنان نوسراوەیەکیان واژۆ کردووە و کارمەندەکانیان لەو بڕیارە ئاگادار کردۆتەوە.
لەو نووسراوەیەدا بە بەرپرسان و چاودێرانی ئەو کۆمپانیایانە ڕاگەیەندراوە کە مافی ئەوەیان نییە سووتەمەنی بدەن بە کۆمپانیاکانی “ئێران ئایر و ماهان ئایر”ی ئێران، کە خراونەتە نێو لیستی گەمارۆکانی ئامریکاوە.
شایانی باسە کە هەر لە گەڵ پێنەدانی سووتەمەنی بە فڕۆکەکانی ئێرانی لە لایەن کۆمپانیا نەوتییەکانی لوبنان، ئاسمانی “تورکەمنستان و پاکستان”یش ڕوو بە فڕۆکە ئێرانییەکان داخرا.
بەپێی ڕاپۆرتی “ئیقتساد نیوز” لەگەڵ دەسپێکردنی گەمارۆکانی ئەمریکا بۆ سەر ئێران، ئاسمانی وڵاتانی “تورکەمنستان و پاکستان” لە سەر فڕۆکەکانی کۆمپانیای “ماهان”ی ئێران داخرا.
جێی ئاماژەیە کە شیرکەتی فڕۆکەوانیی “ماهان” بە هۆی بارکردن و گواستنەوەی چەک و تەقەمەنی وکەلوپەلی نایاسایی، وێڕای فڕۆکە گەشتیارییەکانی سپای پاسدارن خراوەتە نێو لیستی ڕەشەوە.
شایانی باسە کە ماوەیەک لەمەوبەر سەرۆکی ئەنجوومەنی کۆمپانیا فڕۆکەوانییەکانی ئێران، بەهۆی پێنەدانی سووتەمەنی بە فڕۆکە ئێرانییەکان لە لایەن کۆمپانیا سووتەمەنیەکانی تورکیەوە، بە توندی ڕەخنەی لەو کۆمپانیا تورکیانە گرت و ڕایگەیاند؛ کە لەگەڵ دەسپێکی گەمارۆکانی ئەمریکا بۆسەر ئێران، کۆمپانیاکانی تورکیە بڕیاریانداوە کە سووتەمەنی نەدەنە فڕۆکە ئێرانییەکان.
“مەقسوود ئەسعەدی” سەرۆکی ئەنجوومەنی کۆمپانیا فڕۆکەوانیەکانی ئێران، هەواڵی پێوەندیدار بەو کێشەیەی پشتڕاستکردەوە کە لە مێدیاکانی وڵاتانی دەرەوەدا بڵاوکراونەتەوە.
ناوبراو ڕۆژی شەممە ١٢ی خەزەڵوەر بە هەواڵدەریی “ئیسنا”ی ڕاگەیاند “هەموو کۆمپانیاکانی “تورکیە” لە فڕۆکەخانەکانی ئەو وڵاتە ئەرکیانە کە سووتەمەنی بدەن بە فڕۆکە ئێرانییەکان، بەڵام بەهۆی گەمارۆکانی ئەمریکاوە، لە ١٠ی خەزڵوەرەوە بڕیاریانداوە کە سووتەمەنی نەدەنە فڕۆکەکانی ئێران و بڕیارەش ئێمەی ڕووبەڕووی کێشە و گرفت کردۆتەوە”.