كولتوورمیكس رێوڕەسمێكی ساڵانەیە كە لە وڵاتی نۆروێژ بەڕێوەدەچێ و ژمارەیەكی بەرچاو لە نەتەوە جیاوازەكانی وەك: كورد، پاكستانی، عەرەب و هتد.. تێیدا بەشداری دەكەن.
مەبەست لە پێكهێنان و بەڕێوەبردنی ئەم شێوە بەرنامانە لە لایەن دەوڵەتی نۆروێژەوە، نیزیکبوونەوە و ئاشنا کردنی نەتەوە جیاوازەكانە بە كولتوور و شێوە ژیان و هونەر و بەها گرینگە كۆمەڵایەتییەكانی یەكتر.
ئەمساڵیش وەكو ساڵانی پێشوو رێورەسمەكە لە رۆژی ۳ی نۆڤەمبەر و بە بەشداری ژمارەیەكی زۆر لە نەتەوە جۆراوجۆرەكان لە لیلێسترۆم بەرێوەچوو. كۆمیتەی یەكێتی ژنانیش لە وڵاتی نۆروێژ وەكو ساڵانی پێشوو بۆ نمایش كردنی كولتووری بەرزی نەتەوەییمان بەشدار بوو. ژمارەیەكی بەرچاو لە ئەندامانی یەكێتی ژنان بە جل و بەرگی كوردییەوە بەشدار بوون.
رێوڕەسمەكە لە چەندین بڕگە و بەرنامەی جیاواز پێكهاتبوو، سەرەتای بەرنامەكان بە پێشكەش كردنی چەند وتەیەك لە لایەن شارەداریی شێسمۆوە دەستی پێكرد.
دواتر هەر نەتەوەیە و لە كاتی دیاری كراوی خۆی دا بە شێوازی تایبەت كولتوری خۆی بە شێوەی جۆراوجۆری وەكو موزیك و گۆرانی و… پێشكەش كرد، كۆمەڵێك لاو و منداڵی بە توانا و بەهرەمەند بە شێوەیەكی جوان و لێهاتووانە هەریەكە و كلتووری نەتەوەكانی خۆیان وەك سامیەكان، نۆروێژی، ڤیێتنامی، ئێریتیری، سوری و كوردەكان نمایش كرد.
منداڵانی کوردیش لەو فستیڤاڵەدا بە پۆشینی جلوبەرگی کوردی و گوتنەوەی ئاواز و گۆرانی کوردی لە ناساندنی نەتەەی خۆیان و تایبەتمەندییەکانی رۆڵی بەرچاویان گێڕا.