چین لانی کەم دوو کۆمپانیای نەوتی حکوومەتەکەی ئاگادارکردۆتەوە کە خۆیان لە کڕینی نەوتی ئێران دووربخەنەوە و پابەندی سزاکانی ئەمریکا بن تا ئەوکاتەی واشنگتۆن و پێکەن دەگەنە رێککەوتن.
ئاژانسی بلۆمبێرگ ئاشکرایکردووە، هەردوو کۆمپانیای ناشناڵ پیترۆلیۆم کۆرپ و سینۆپێکی چینی هەناردەی نەوتی ئێران رادەگردن و لەگەڵ ئەمریکا دەکەونە گفتوگۆ، ئەگەر لە گفتوگۆکانیان لەگەڵ ئەمریکا سەرکەوتوو نەبن ئەوا ئێران کڕیارێکی گرنگ لەدەستدەدات.
ئەم هەنگاوەی چین لە کاتێکدایە، پیشتر هەردوو وڵاتانی ژاپۆن و کۆرەی باشوور بڕیاری بایکۆتکردنی نەوتی ئێرانیاندا، ئەمەش لەبەر ئەوەی ئەو وڵاتانەی پابەند نابن بە سزاکانی ئەمریکا بۆ سە ئێران، مەترسی ئەوەیان لەسەر دەکرێت کە لە سیستەمی دارایی ئەمریکا بلۆک بکرێن.
ڕۆیتێرز ئاشکرایکردووە، هەردوو کۆمپانیا چینییەکە بۆ مانگی یانزدە هیچ بڕە نەوتێکی ئێرانیان نەکڕیووە.
بڕیارە لە 13ی خەزەڵوەر، ئەمریکا بەشی دووەمی سزاکانی سەر ئێران بسەپێنێت و ئامانجیشی ئەوەیە هیچ کڕیارێکی نەوتی ئێران نەهێڵێت، بەڵام تاکو ئێستا بە شێوەیەکی فەرمی حکومەتی چین کە یەکێکە لە گەورە کڕیارانی نەوتی ئێران هەڵوێستی خۆی رانەگەیاندووە.
هەر لەو پێوەندییەدا هەواڵدەریی ڕۆیتێرز لە هەواڵێكدا رایگەیاند عێراق ناردنی نەوتی كەركووك بۆ ئێران رادەگرێت، لەگەڵ حكوومەتی هەرێمی كوردستان ڕێكەوتوون تا لەمەودوا نەوتی كەركووك لە ڕێگەی هەرێمەوە رەوانەی تورکیە بكرێت.
ڕۆیتێرز ئاماژەی بەوەش داوە كە ئەم بڕیارەی بەغدا پەیوەندی بە پەیوەستبوونی عێراقەوە هەیە بەو سزا ئابوورییانەی ئەمساڵ ئەمریكا بەسەر ئێرانیدا سەپاند.
ئێستە عێراق رۆژانە 30 هەزار بەرمیل نەوتی خاو لە كەركووكەوە لە ڕێگەی تانكەری نەوتەوە رەوانەی ئێران دەكات.
