گرووپی تایبەتی هەڵوێستی دارایی واتە FATF لە کۆتایی کۆبوونەوەکەیدا ڕایگەیاند کە بۆ ماوەی چوار مانگی دیکە ئێران لە لیستی وڵاتانی مەترسیدار لە پێوەندیی لەگەڵ تیرۆر و دابینکردنی باری ماڵی گرووپە تیرۆریستەکان دەمێنێتەوە.
“سی ان اس نیوز” ٢٧ ی رەزبەر بڵاویکردەوە کە ئەگەر ئێران بتوانی لە لیستی ڕەش واتە FATF قوتار بێت، سەرەڕای گەمارۆ توندەکانی ئەمریکا، ئەوە دووبارە دەتوانێ بگەڕێتەوە نێو لیستی وەبەرهێنەرانی نێونەتەوەیی، بەڵام لە کۆبوونەوەی FATF کە لە “پاریس” بەڕێوەچوو، بۆ ماوەی چوار مانگ ئێرانی لە لیستی خۆڵەمێشی هێشتەوە کە ئەمە دەبێتە هۆی ئەوەی ئێران نەتوانێ خۆی لە گەمارۆکان رزگار بکا.
سەرۆکی FATF لەوبارەوە رایگەیەند کە بەرەو پێش نەچوونی ئێران بۆ هاتنە نێو ئەو کۆنوانسیۆنە ئێمەی تووشی گومان کردووە و، هەر بۆیە بۆ مانەوە یا دەرچوون لە لیستی ڕەش ،چوار مانگی دیکە کاتمان داوە بە ئێران تاکوو بتوانێ لەو کۆنوانسیۆنەدا ناوی خۆی تۆمار بکات.
شایانی باسە کە FATF پێشترچوار داواکاریی ئاراستەی ئێران کردبوو کە بریتی بوون لە : دەست هەڵگرتن لە سپیكردنەوەی پارە، لایحەی پێداچوونەوە بە یاسای بەرەنگار بوونەوەی پشتگیریی دارایی لە تێرۆریزم، دەست هەڵگرتن لە تاوانی بەرنامە بۆداڕێژراو، ناسراو بە کۆنوانسیۆنی ” پالرمو”، بەڵام “شۆڕای نیگابان” ی ئێران تەنیا یەکێک لەو داواکارییانەی قبووڵ کردووە.
ئەوە هەلی کۆتاییە بۆ کۆماری ئیسلامی ئێران و، ئەگەر کاربەدەستانی رێژیمی ئێران لەو حەتووەدا داواکارییەکانی FATf پەسەند نەکا ئەوە ئێران هەر لە لیستی ڕەش دەمێنێتەوە. بە مانەوەی کۆماری ئیسلامی لە لیستی ڕەش دا و گەمارۆ تازەکان کە لە ماوەیەکی نیزیکدا دەست پێدەکەن، ئێران تووشی قەیرانێکی گەورە دەکەن. شایانی باسە کە لێپرسراوی جێبەجێکردن لە FATF رایگەیاند کە کۆبوونەوەی پاریس دوایین دەرفەتە بۆ ئەوەی ئێران بە جێبەجێکردنی ئەو بەندانەی کە لە لایەن FATF بۆی دیاریکراون لە لیستی ڕەش نەمێنێتەوە. ئەوە لە حالێکدایە کە 10 مانگ بەر لە ئێستا ئێران بەڵێنی جێبەجێکردنی ئەو بەندانەی دابوو بەڵام تاکوو ئێستا جێبەجێ نەکراون.
شیاوی باسە لە یەک دوو حەوتووی ڕابردوودا FATF، لە نێوباڵەکانی ڕێژیم هەڵویستی جۆراوجۆری لێکەتووتەوە بەڵام گوشارە نێونەتەوەییەکان بووتە هۆی نەرمی نواندنی کۆماری ئیسلامی و ناچارن مل بەو داواکارییە نێونەتەوەییە بدەن.