نۆهەمین كۆبوونەوەی ناوەندی هاوكاریی حیزبەكانی كوردستانی ئێران رۆژی شەممە٧ی رەزبەری ساڵی ١٣٩٧ی هەتاوی بەرامبەر بە ٢٩ی مانگی دێسامبری٢٠١٨ی زایینی بەڕێوەچوو. كۆبوونەوەكە سەرەتا بۆ رێزلێنان لەیادی گیانبازی سەرجەم شەهیدانی 17ی خەرمانان بە چەند ساتێك بێ دەنگی دەستی پێكرد، هەرەوها بۆ رێزلێنان لەیادی هاوڕێی شەهید سۆهەیلا قادری ئەندامی ناوەندی هاوكاری حیزبەكانی كوردستانی ئێران چەپکە گوڵێكی رێز و وەفاداری بۆیادی خۆشەویستی دانرا.
دواتر بەڕێز ساڵح شەریفی ئەندامی دەفتەری سیاسی كۆمەڵەی شۆڕشگێڕ و بەرپرسی دەورەیی ناوەندی هاوكاری حیزبەكانی كوردستانی ئێران لە سەر كارو چالاكی ئەم دەورەیە راپۆرتێكی پێشكەشی بەشدار بووان كرد. پاش راپۆرتەكە دەستوور كاری كۆبوونەوەكە خوێندرایەوە. لە سەر چالاكییەكانی ئەم دەورەیەی ناوەندی هاوكاری هەر كام لە نوێنەرانی حیزبەكان وێڕای سپاس وماندوونەبوونی هەموو لایەنەكان لەم قۆناغە لە سەر هەر كام لە خاڵەكانی كۆبوونەوەكە ئاڵ و گۆڕی بیروڕایان كرد.
بابەتێكی دیكەی كۆبوونەوەكە هەڵسەنگاندنی كردەوە قیزەون و دژە مرۆییەكانی ئەم دواییانەی كۆماری ئیسلامی ئێران بوو بە تایبەت لە سێدارەدانی سێ بەندكراوی سیاسی كورد و هەروەها هێرش بۆ سەر بنكەی سەركردایەتی حیزبی دیمۆكراتی كوردستان و فێرگەی پێشمەرگایەتی حیزبی دیمۆكراتی كوردستانی ئێران كە بەداخەوە كۆمەڵێك لە سەركردایەتی حیزبی دیموکراتی کوردستان و كادر و پێشمەرگەی ئەم دو حیزبە شەهید و بریندار بوون. تەوەرەیەكی دیکەی گرینگی كۆبوونەوەكە باس لەمانگرتنی سەركەوتووانە و سەرتاسەرییەكەی رۆژی 21ی خەرمانانی كوردستانی رۆژهەڵات بوو كە لە لایەن ناوەندەوە وەك رۆژێكی مێژوویی و پڕ دەستكەوت لە خەباتی جەماوەری و سیاسی پێناسە دەكرێت و ئەو بزووتنەوە جەماوەریە دەنگدانەوەیەكی بەرچاوی هەبوو لە ئاستی هەموو ناوچەكە و میدیاكان و سەلماندنی کە بزووتنەوەی كورد زیندووە و ئامادەی هەر جۆرە شێوازێكە بۆخەباتی جەماوەری و پشتیوانی لە حیزب و لایەنە سیاسیەكان و هەروەها رۆڵە تێكۆشەرەكانی لە زیندانەكان.
لە بەشێكی دیكەی كۆبوونەوەكەدا باسی دەستبەرسەرکردن و گرتنی ئەو كەسانە كرا كە لە لایەن كۆماری ئیسلامی ئێرانەوە بە هۆی بەشدارییان لە خەباتێكی مەدەنی و جەماوەری لە رۆژی ٢١ی خەرماناندا رەوانەی گرتوخانەكان كراون و لە ژێر لێپرسینەوەی دامودەزگا ئەمنیەتییەكانی كۆماری ئیسلامی ئێران دان. ناوەند داواكارە لە رێكخراوەكانی مافی مرۆف، رێكخراوی نەتەوەیەكگرتوەكان و … هتد لە هەمبەر بە هاناچوون و پاراستنی گیانی هاوڵاتیانی دەست بەسەر كراوی مانگرتنەكەی ٢١ی خەرمانانەوە بێ دەنگ نەبن و بەرامبەر بە چارەنووسیان هەڵوێستیان هەبێ و هەر وەها لە خەڵكی تێكۆشەری كوردستان دەخوازێ پشتیوانی رۆڵەكانیان بن و بەر هەر شێوازێك كە بۆیان دەكرێ بۆ ئازادی و رزگاریبەندكراوەكانی مانگرتنەكەی٢١ی خەرمانانی كوردستان تێبكۆشن.
تەوەرێكی دیكەی كۆبوونەوەكە رێزگرتن لەیادی شەهیدانی ژینگەپارێزی مەریوان بوو كە لە ٣ی مانگی خەرمانانی ساڵی ١٣٩٧یهەتاوی بە هۆی ئاگركەوتنەوە لە ژینگەكانی كوردستان لە ناوچەی مەریوان بۆ پاراستنی جوانی و ژینگەی كوردستان گیانی ئازیزیان لە دەست دا، ناوەندی هاوكاریی حیزبەكانی كوردستانی ئێران بەیادی ئەم شەهیدانە پێشنیار دەكات كە رۆژی ٣ ی خەرمانانی وەك رۆژی ژینگەپارێزی كوردستان دیاری بكرێت و وەك نەریتێكی شۆڕشگێڕانەو نیشتمانپەروەرانە ئەم رۆژە رێزی لێبگیردرێت.
نۆهەمین كۆبوونەوەی ناوەندی هاوكاریی بە پەسەند كردنی چەند بریار لە سەر كارو ئەركەكانی داهاتووی و بەردەوامی و چالاك كردنەوەی هەرچی زیاتری ناوەند كە چەند كاتژمێری خایاند دوای لە كەش و هەوایەكی دۆستانە كۆتایی پێهات.
ناوەندی هاوكاری حیزبەكانی كوردستانی ئێران
٧ی گەڵارێزانی ساڵی ١٣٩٧ی هەتاوی
٢٩ی سێپتامبری٢٠١٨ی زایینی
ناوەندی هاوكاریی حیزبەكانی كوردستانی ئێران بریتین لە:
حیزبی دیمۆكراتی كوردستان
كۆمەڵەی زەحمەتكێشانی كوردستان
سازمانی خەباتی كوردستانی ئێران
حیزبی دیمۆكراتی كوردستانی ئێران
كۆمەڵەی شۆڕشگێری زەحمەتكێشانی كوردستانی ئێران
