کارناسانی ئابووریی ئێران، پیشبینی ئەوەیان کردبوو کە دوای قسەکردنی دۆناڵد تڕامپ و، حەسەن روحانی لە هەفتاوسێیەمین کۆڕی گشتیی نەتەوەیەکگرتووەکان، نرخی دراو لە ئێران بە پێی ئەو بارودۆخە کە تێکەوتووە بەرزتر ببێتەوە.
هەڵکشانی خێرای نرخی دۆلار لە ئێران، کێشە ئابوورییەکانی ئەو وڵاتەی قووڵتر کردووتەوە.
بە پێی ئەو ڕاپۆڕتانەی کە هاووڵاتیییان بە “کوردستان وکورد” یان ڕاگەیاندووە، رۆژبەدوای رۆژ، دۆخی ئابووریی وڵات نالەبارتر دەبێ و، زۆرێک لە پێداویستییەکانی ژیان، یان لە بازاڕەکان دەس ناکەون، یان بە شێوەی سەرسۆڕهێنەر نرخیان گرانتر بووە.
ئەمرۆ لە بازاڕی دراوی ئێران، نرخی دۆلار شانی لەشان ٢٠هەزارتمەن دا.
هەڵکشانی نرخی دراو و دابەزینی نرخی پارەی ئێرانی و قووڵبوونەوەی کێشە ئابوورییەکان، تەنانەت بۆتە گرفتێکی ئەمنیەتیی وڵات و، لە زۆربەی شارەکانی ئێران ، هێزی نیزامی و “یگان ویژە” بۆ ڕووبەڕووبوونەوە لەگەڵ هەرچەشنە ناڕەزایەتییەکی جەماوەری موڵدراون.
شیاوی باسە ڕۆژی ڕابردوو لە کۆبوونەوەی ساڵانەی نەتەوەیەکگرتووەکان ، دوای ئەوەی تڕامپ لەسەر زیاترکردنی گەمارۆکان بۆسەر ئێران پێداگری کردەوە، نرخی دۆلار لە ئێران بەرزتر بووەو بە گوتەی دەمڕاستەکانی ڕێژیم، کۆنتڕۆڵی بازاڕی دراو لە دەستی دەوڵەت دەرچووە.
