دۆناڵد تڕامپ سەرۆککۆماری ویلایەتەیەکگرتووەکانی ئامریکا لە هەفتاوسێیەمین کۆڕی گشتیی نەتەوەیەکگرتووەکان بە باسکردن لە رووداوەکانی جیهان و، بە چەخت کردن لە سەر قەیرانەکانی رۆژهەڵاتی ناوەڕاست، باسی لە بارودۆخی ئابووری و سیاسیی ئێران کرد.
سەرۆککۆماری ئامریکا، سەرەتای قسەکانی بە هەبوونی هەڕەشەکان بۆ سەر ئاسایشی جیهانی، کۆمەڵێک گرفت و کێشە ئەمنییەکانی لە ڕۆژهەڵاتی ناوەڕاستی خستەڕوو.
دۆناڵد تڕامپ بە باس کردن لە گۆڕانکارییەکان لە وڵاتانی ناوچە کەنداو و رووبەڕوو بوونەوەی ئەو وڵاتانە لە بەرانبەر ڕادیکالێزم ئیسلامی، داوای پشتیوانی لەخەڵکی سووریە کرد و، ڕایگەیاند؛ وڵاتانی تێکدەری دۆخی سووریە، دەبێ کۆتایی بە دەستێوەردان و کێشەنانەوە لەو وڵاتە بهێنن و، دەوڵەتی ئێرانی لەو بارەوە بە تاوانبار زانی.
سەرۆککۆماری ئامریکا بە باس کردن لە هەلومەرجی سیاسی و ئابووریی ئێران، ڕێبەرانی ئێرانی بە فێڵباز دەغەڵکار ناوبردو، باسی لەوە کرد کە بەرپرسانی باڵای ڕێژیمی تاران، سروەت و، سامانی خەڵکی ئێرانیان لە گیرفانی خۆیان ناوە.
دۆناڵد تڕامپ سەربارەت بە ئێران سەرلەنوێ پێداگری کرد کە دەبێ تاران پڕنسیپ و چواڕچێوە نێونەتەوەییەکان بپارێزێ و واز لە دەستێوردان و پێشێلکارییەکانی لە ناوچەکە بهێنێت.
سەرۆککۆماری ئامریکا لە درێژەی قسەکانیدا ئاماژەی بە سەرەرۆییەکانی کۆماری ئیسلامی دا و، بە وەبیرهێنانەوەی کشانەوەی وڵاتەکەی لە گرێبەستی “بەرجام” و وەگەڕ خستنەوەی گەمارۆەنۆێیەکان بۆسەر ئێران، باسی لەوەش کرد کە خولی دوویەمی ئەو گەمارۆییانە بەڕێوەیەو، لە ٥ی نوامبری ئەمساڵ دەخرێتە بواری جێبەجێ کردنەوە.
دۆناڵدتڕامپ لەو پێوەندییەدا داوای لە سەرجەم وڵاتانی جیهان کرد، کە بە مەبەستی پشتیوانی کردن لە خەڵکی چەوساوەی ئێران، واز لە هاوکاری و پشتیوانی کردنی کۆماری ئیسلامی بهێنن و، پێوەندییە بازرگانییەکانی خۆیان لە گەڵ ئەو ڕێژیمە ڕابگرن.
