چالاکیی هۆگرانو ئەویندارانی ئامانجەکانی د.قاسملوو لە نیوخۆی ڕۆژهەلاتی کوردستانو ناڕەزایەتی نواندنی چالاکانی دژ بە تیرۆریزمی دەوڵەتی لە بەرەبەری ٢٢ی پووشپەڕ، ٢٦ ساڵەی تیرۆری د.قاسملووی ڕێبەڕ دا، موخابراتی کۆماری ئیسلامیی ئێرانی ناچار کردوە بە بیانووی گرفتی تەکنیکی، پێوەندیی کاربەرانی تەلەفۆن لە نیوخۆی ڕۆژهەلات لە هێندێک لە شارەکان بە دەرەوەی وڵات بپچڕێنێ. بە گوێرەی پەیامێک کە ئیدارەی موخابرات (بۆ وێنە لە هێندێک شار و ناوچەی پارێزگەی ورمێ)بڵاوی کردوەتەوە: “بە هۆی کێشەی تەکنیکی لە کاتژمێر ١٢ی ئەمشەو (یەکشەممە لە سەر دوو شەممە) هەتا ٧ی بەیانی پێوەندیی بە دەرەوەی وڵات، دەوەستێ.”! هەر لە دەروازەی ٢٢ی پووشپەڕ دا، لە لایەن موخابراتەوە راگەیەندراوە کە تۆڕی ئەنترنێتیش بە هۆی” بەرەوژوور چوونی”ارتقاء سامانە مدیریت مشترکین” یا بەرەوژوور چوونی بەڕێوەبەرێتیی کاربەرانی ئەنترنێت) لە کاتژمێر ٥ی دوانیوەڕۆی یەکشەممە هەتا ٨ی بەیانیی ڕۆژی دوو شەممە(بیستو شەشەمین ساڵڕۆژی تیرۆری د.قاسملوو و هاوڕێیانی) لە هێندێک لە سرویسەکانی دا ، لە گەڵ گیروگرفت بەرەوڕوو دەبێ”. شایانی باسە ترس لە چالاکیی خەڵکی بوێر و بە هەڵوێستی ڕۆژهەلاتی کوردستانو نیشاندانی بێزاریو نارەزایەتییان لە سەرکوتو تیرۆری دەوڵەتی لە ٢٢ی پووشپەڕ دا ، وای کردوە کە ڕێژیمی کۆماری ئیسلامی هەموو ساڵێ لە بەرەبەری ٢٢ی پووشپەڕ و لە ڕۆژی ٢٢ی پووشپەڕ دا، شانبەشانی هەر چی ئەمنیەتی کردنی کەشوهەوای شار و ناوچەکانی کوردستان، کێشە و گرفت بۆ هێڵی تەلەفۆنو ئەنترنێتیش دروست بکا. جگە لەمەش زۆر جار پارازێت دەخاتە سەر پەخشی کاناڵی ماهوارەییەکان بە تایبەتی کوردکاناڵ. بۆ وێنە هەر ئەمڕۆ دوانیوەڕۆ لە سنەو کامیارانەوە، هەواڵمان پێ گەیشت کە کوردکاناڵ پاڕازێتی لە سەر بووە. جگە لەمەش بە پێی ئەو زانیارییانەی بۆ کۆمیسیۆنی تەشکیلاتی حیزبی دیموکراتی کوردستان هاتوون، لە چەند ڕۆژی ڕابردوو دا خەدەماتی ناردن و گەیاندنی کورتەنامە لە هێندێک شار و ناوچەی پارێزگای سنە لە گەڵ گرفت بەرەوروو بووە.
کێشە دروستکردنی ئەمساڵی موخابراتی کۆماری ئیسلامی بۆ کاربەرانی هێڵەکانی تەلەفۆن و ئەنترنێت لە کاتیک دایە کە حیزبی دیموکراتی کوردستان، داوای لە خەڵکی رۆژهەلاتی کوردستان کردوە، بە هەموو شێوەیەکی گونجاو، بێزاریی خۆیان لە تیرۆریزمی کۆماری ئیسلامی و وەفاداریی خۆیان بە ئامانجەکانی ڕێبەری شەهیدی خۆیان د.قاسملوو، پێشان بدەنەوە. حیزبی دیموکراتی کوردستان لەم پیوەندییە دا هەر وەها داوای کردوە، خەڵک نەچنە بازاڕ و شەقام و بەم جۆرە هاندەر و یارمەتیدەری بازاڕییەکان بن بۆ داخستنی دوکان و بازار و وەڕێخستنی مانگرتنی گشتی بە پیی توانای خۆیان.
حیزبی دیموکراتی کوردستان
کۆمیسیۆنی تەشکیلات
شەوی ٢١ لە سەر ٢٢ی پووشپەڕی ١٣٩٤
١٢ لە سەر ١٣ی جولای ٢٠١٥
