موختار زارعی رۆژنامەنووس و چالاکی مەدەنیی کورد کە رۆژی چوارشەممە ٢١ی خەرمانان بە هۆی هاندانی خەڵک بۆ مانەوەو لە ماڵ و پەیوەستبوونیان بە مانگرتنی سەرانسەریی کوردستان، دەسبەسەرکرا بوو، ئەمرۆ شەممە ٢٥ی خەرمانان بە شێوەی کاتی ئازاد کرا.
ئەو رۆژنامەنووسە کوردە، لە لاپەڕەی فەرمیی خۆی لە تیلیگرام ڕایگەیاندوە: کە ئەمجارە بە تاوانی ڕێکخستنی گردبوونەوەی نایاسایی و هەڵخەڵەتاندنی خەڵک دەسبەسەرکرام، لە کاتێکدا من داوم کردووە خەڵک لە ماڵەوە بمێننەوە نەک خۆپێشاندان بکەن!
جێیوەبیرهێنانەوە موختار زارعی پێش مانگرتنی ٢١ی خەرمانان لە گرتە ڤیدیۆیەکدا داوای لە خەڵکی کوردستان کردبوو، کە بە مەبەستی مەحکوومکردنی توندوتیژی و ئێعدام و مووشەکبارانی تێکۆشەرانی کورد ، رۆژی چوارشەممە مانگرتن بکەن و لە ماڵەوە مۆمێک هەڵبکەن.
شیاوی باسە رۆژی چوارشەممە ٢١ی خەرمانان هاوکات لە گەڵ مانگرتنی گشتیی کوردستان کە بە هاودەنگی و هاوکاریی حیزبە کوردییەکان و چالاکانی مەدەنی و سیاسیی کورد ڕێکخرابوو، دامودەزگا ئەمنییەکان زیاتر لە ٤٠ چالاک و هەڵسووڕاوی نێوخۆی وڵاتیان لە شارە جیاجیاکانی کوردستان دەستگیر کردو ، دەگوترێ ١٩ کەسیان بە دانانی بارمتە بەشێوەی کاتی ئازاد کراون.