رۆژ ڕابردوو ١٤ی خەرمانان بە بەشداریی چەند ڕێکخراوی فەرهەنگی و مەدەنیی شاری بۆکان کە بڕیار بوو بۆ یادی چوار شەهیدی ژینگەپارێزی مەریوانی، ڕێوڕەسمی ڕێپێوان بەرەو کێوی بەردەزەرد بەڕێوە ببن، لە لایەن هێزە ئەمنییەکانەوە پێشیان لێگیرا.
بەپێی ئەو زانیارییانەی کە لە شاری بۆکانەوە بە دەستمان گەیشتووە، رۆژی چوارشەممە بە هاوکاری ئەنجومەنی فەرهەنگی”ئەدەب” و ڕێکخراوی ژینگەپارێزی”وڵات” و بەشێک لە وەرزشوانانی ئەوشارە ، ویستیان لە ڕێورەسمێکی مەدەنییانەدا یادی چوارشەهیدی ژینگەپارێز لە داوێنی بەردەزەرد بەرزڕابگرن، کە هەر لەسەرەتای گربوونەوەی خەڵک، مەئموورانی ئیتلاعات کەوتوونەتە جموجۆڵ و چاوەدێری و وێنەگرتن لە بەشداربووان. پاشان هێزە ئنتیزامییەکانیش گەێشتوونەتە شوێنی گردبوونەوەو بڵاوەیان بە خەڵک کردووە.
سەرچاوەیەکی ئاگادار گوتی: ڕێگریی کردنی هێزە ئەمنی و ئینتیزامییەکان و تێکدانی ئەو ڕێوڕەسمە ، تووڕەی بەشداربووانی لێکەوتەوەو، دواتر بۆ ئەوەی نەبێتە بیانوویەک بۆ دەسبەسەر کردنی لاوان و خەڵکانی بەشدار، بە نێوبژیوانی کەسانی دڵسۆز، هیزە ئینتزامییەکان وازیان لە بەشداربووان هێنا.
