خەڵکی بەئەمەگی کوردستان بە بۆنەی کارەساتی گیان لەدەستدانی چوار ژینگە پارێزی نیشتمان، بە بەڕیوەبردنی رێورەسمی تایبەت بە بۆنەوە هاوخەمی خۆیانیان لە گەڵ خەلکی مەریوان و کۆمەڵگەی مەدەنی دەربڕی.
رۆژی پێنجشەممە٨ی خەرمانان خەڵکی شۆرشگێڕی “نێ”مەریوان، بە بەڕیوەبردنی ڕێوڕەسمێکی بەشکۆ، وێڕای بەرزڕاگرتنی یادی شەریف باجوەر و هاوڕێیانی کە بوون بە قوربانی نیشتمان، خۆیان بەدرێژدەری دڵسۆزانی گەل زانی.
خەڵکی چاونەترس و تێکۆشەری “نێ” بە وتنەی سروودی حەماسی و هەڵکردنی وێنەی شەهیدانی ژینگە، بۆ جارێکی دیکە لەگەڵ سەرجەم خەمخۆران و تێکۆشەرانی کورد، لە سەنگەرجیاجیاکان پەیمانی وەفادارییان نوێ کردەوە.
هەروەها لە رێورەسمێکی هاوشێوەدا بەشێکی بەرچاو لە چالاکانی مەدەنی و ژینگەپارێزانی کورد لە شاری سنە و لە بناری چیای ئاویەر، خەمی لەدەستدانی چوار ژینگە پارێزی مەریوانیان بە هی خۆیان زانی و، لە ئەوپەڕی بوێرییەوە یاد و ڕێبازی ژینگەپارێزانی تێکۆشەریان بەرز ڕاگرت.
خوێندنەوەی سروودی شٶڕشگێرانە، بڵاوکردنەوەی وێنەو تراکتی پێوەندیدار و هەوڵدان بۆ یەکڕیزی ویەکگرتوویی لە تابلۆ هەرە جوانەکانی ڕێوڕەسمی شاری سنە بوو، کە بۆ یادی ژینگەپارێزانی شەهید، بەرێوەچوو.
شیاوی باسە لە شاری بانەش چالاکانی مەدەنی بۆ یادی گیان لەدەستدانی دڵسۆزانی گەل، ڕێوڕەسمی ماتەمین و سەرەخۆشییان بەرێوەبرد.
جێیئاماژەیە لە دوای ئەو کارەساتە دڵتەزێنە، هەررۆژە و، لە شاڕیک لە کوردستان خەڵکی بەپەرۆشی کوردستان ڕێوڕەسمی تایبەتیان بەڕێوەبردوەو هەر بەردەوامە.
تا ئێستا لە شارەکانی مەهاباد، قوروە، دێولان، سنە، ئیلام، بانە، سەلاسی باوەجانی، شنۆ ، ئەو رێوڕەسمە بەرێوەچوەو، بڕیارە لە شاروناوچەکانی دیکەش بەڕێوەبچێت.
