ئەمرۆچوارشەممە ٧ی خەرمانان گەڵاڵەی پرسیار و ڕوونکردنەوەی سەید محەممەد بەتحایی وەزیری پەروەردەو فێرکردنی کۆماری ئیسلامی ڕادەستی هەیئەتی سەرۆکایەتی مەجلیس کرا.
بە گوتەی عەلی ئەکبەر یووسفنەژاد، ئەندامی لێژنەی سەرۆکایەتی مەجلیس شوڕای ئیسلامی، گەڵاڵەی لێپرسینەوە لە وەزیری پەروەردەو فێرکردن بە ئیمزای ٢٠ نوێنەری مەجلیس گەیشتووەو، بە پێی پێرەوی نێوخۆی مەجلیس ماددەی ٢٢٥ ، سەیدمحەممەد بەتحایی دەبێ لە ماوەی دە رۆژدا، بۆ روونکردنەوە لەسەر ١٥ پرسیار ، لە مەجلیس ئامادە بێ.
پێویستبەگوتنە، کە گەڵاڵەی لێپرسینەوە لە وەزیری پەروەردە و فێرکردن، ١٥ خاڵی پێوەندیدار بە بواری پەروەردە و ڕاهێنان گرتووتەوە ، کە بەرچاوترینی بریتین لە؛ “جێبەجێ نەکردنی گرێبەستی گۆڕانکاریی ژێرخانەیی پەروەردەوفێرکردن لە ئێران، گرینگینەدان بە ناوەڕۆکی کتێب بۆ قوتابخانەکان، خەمساردبوون لەهەمبەر داواکاریی مامۆستایان و، وەداوکەوتنی مووچەکانیان، ساختەکاری لە ناوەڕۆکی کتێبە مێژووییەکان، پەرەسەندنی گەندەلێی ئیخلاقی و ماڵی لە خوێندنگەو، قوتابخانەکانی ئێران و…
شیاوی باسە سەید محەممەد بەتحایی بە پێچەوانەی بانگەشەکانی حەسەن روحانی لە سەردەمی هەڵبژاردنەکان و وادەوبەڵێنی بۆ جێبەجێ کردنی ئەسڵی ١٥ لە یاسای بنەڕەتی ئێران سەبارەت بە پرسی خوێندن ونووسین بەزمانی دایک ، لە قوتابخانەکانی ئێران ، چەندجار لەو پێوەندییەدا دژکردەوەی نێشان داوە.
سەید محەممەد بەتحایی وەزیری پەروەردەی ئێران رۆژی ٢٣ی پووشپەڕی ٩٧ی هەتاوی لە سەفەرێکدا بۆ پارێزگای ئیسفەهان وێڕای ڕەخنەگرتن لەوە کە گوایە لە هێندێک لە قوتابخانەکانی ئێران مامۆستایان بە زمانی دایک، وانە دەڵێنەوە لەو بارەوە گوتی: لە هێندێک لە ناوچەکان بینراوە کە مامۆستاکان بە زمانی دایک، قوتابییەکان پەروەردە دەکەن کە ئەوە کارێکی یەکجار مەترسیدارە، چونکە مناڵەکان لەگەڵ بنەماڵەی خۆیان فێری زمانی دایک دەبنو، پێویست ناکا لە قوتابخانەش هەر بە زمانی دایکییان وانە بخویننو دەشێ زمانی فەرمیی وڵات فێرببن.
قسەکانی وەزیری پەروەردە بە پێچەوانەی بۆچوونی زانستی لەو بارەوە، بەڵکوو ڕاهێنان و پەروەردە کردنی منداڵ بە زمانی دایک، خاڵێکی گرینگە لە بوواری فێرکردن وپەروەردە و، قوتابخانە وەک ماڵی دوویەم بۆ منداڵ دێتە ئەژمار.
چاوەڕوانی ئەوە دەکرێ کە نوێنەرانی نەتەوەکانی دیکە بە تایبەتی نوێنەرانی کورد لە مەجلیس لە رۆژی لێپرسنەوە بە پێی وادەوبەڵێنی سەرۆک کۆمار و هەروەها بەپێی یاسای بنەڕەتی ئێران، پرسی زمانی دایک لە خوێندنگەو قوتابخانەکان وەبیر وەزیری پەروەردەو فێرکردن بهێنەوەو لە سەر هۆکاری جێبەجێ نەکردنی ئەو پرسە یاساییە لێی بپرسنەوە.
