لە سێیەمین رۆژ لە مەرگی دڵتەزێنی چوار پارێزەری نیشتمان بە هۆی ئاگربەردان لە دارستانی مەریوان، پەیامی هاوخەمی و هاوسۆزی کردنی لایەن و ڕێکخراوە فەرهەنگی وسیاسییەکان هەر بەردەوامە.
رۆژی ڕابردوو نوێنەرانی کورد لە مەجلیس لەگەڵ سەرجەم خەڵکی کوردستان و، بەتایبەتی بنەماڵەی ئەو چوار چالاکە مەریوانییە هاوخەمییان دەربرێ و، هەروەها “مجمع مشورتی یارسان” خۆیان بە خاوەنی ئەو کۆستە دڵتەزێنە زانی و، تێکدان و تۆپبارانی ژینگەی کوردستانیان بە بیانووی جۆراجۆر شەرمەزار کرد.
لە بەشێک لە پەیامەکەیاندا ڕووبە بەرپرسانی کۆماری ئیسلامی، داوایان کردووە کە لە هەمبەر تێکدانی ژینگە وسروشتی کوردستان بەر پرسایەتییان هەبێ و، هەروەها ئەوانیش وەکوو بەرەی یەکگرتووی کورد داوایان کردوە، رۆژی سێ خەرمانان بە رۆژی ژینگەپارێزانی کوردستان بناسرێت.
هەروەها ڕێکخراوە مەدەنییەکانی شاری مەریوان بە دەرکردنی بەیاننامەیەک یادوناوی چالاکانی بوواری مەدەنی و ژینگەپارێزانی فیداکاریان بەرز ڕاگرت .
شیاوی باسە بەشێکی بەرچاو لە ئەنجومەن و ڕێکخراوە ئەدەبییەکانیش بەدەر کردنی پەیامی ماتەمینی ، رێزیان لە شەریف باجوەر و هاورێیانی گیان بەختکردوو گرتووەو هەوڵدان بۆ پاراستنی ژینگەی نیشتمانیان بە ئەرکێکی گرینگی نەتەوەیی لە قەڵەم داوە.
