شەوی یەکشەممە ٢٨ی گەلاوێژ خەڵکی مەریوان بە مەبەستی ناڕەزایەتی دەربڕین لەهەمبەر کەمتەرخەمیی بەرپرسانی شارەداریی ئەوشارە خۆپێشاندانێکی بەربڵاویان بەيڕێوە برد.
خەڵكی شاری مەریوان بە ئاگرتێبەردان لە زبڵ و زاڵی کۆنەکراوی ئەوشارە و دروشم دان بە دژی بەرپرسانی شارەداریی کە چەندین ساڵە نەیاتوانیوە گرفتی کۆکردن و لە ناوبردنی زبڵ وزاڵی شاری مەریوان چارەسەر بکەن ، لە ئەوپەڕی تووڕەییەوە خوازیاری دەس لەکارکشانەوەی بەرپرسان، بەتایبەتی شارەداری شارەکەیان بوون.
دەگوترێ زیاتر لە ١٥ ساڵە شاری مەریوان و دەوروبەری لە گەڵ کێشەی پاشماوەکان ڕووبەروویە و، بڕیار بووە کە بۆ چارەسەری ئەوکێشە بەشێوەی زانستی کە خەسار لە ژینگەش نەدرێ، لە دەوروبەری شاری مەریوان کارخانەی وەدەستهێنانەوە(بازیافت) دروست بکرێ.
بەڵام دوای چەند ساڵ دەنگۆی ئەوە هەیە کە بڕی پارە تەرخان کراو، لە نێوان چەن کەس لە ئەندامانی شوڕای شارو شارەداریی مەریوان حەپەلووش کراوە و ، لە لایەک دیکەش خۆلێ بێساحیب کردنی شارەداریی لە پاک وخاوێن ڕاگرتنی شار و کۆکردنەوەی زبڵ وزاڵەکان، بۆ بە هۆی ئەوەی کە خەڵکی مەریوان سەرلەنوێ خۆپێشاندان بەڕێوەببەن و ئەمجارە لە وڵامی وادەو بەڵێنی بەرپرسان، دەنگیان هەڵبڕی کە دەبێ دەست لە کار بکشێنەوە.
شیاوی باسە ساڵی رابردووش خەڵکی دۆڵی سماقانی مەریوان بە پاڵپشتی ژینگەپارێزان رێگەیان نەدا کە شارەداریی ئەوشارە پاشماوە و زبڵ و زاڵەکان لەو شوێنە گەشتیارییە چاڵ بکات.
