بە پێی هەواڵیک کە لە وڵاتی ئاڵمان بە دەستمان گەیشتووە، بەهارە قوربانی کیژۆڵەی بنەماڵەی قوربانییەکان، کە لە مێژە لە ریزی تێکۆشەرانی دێموکرات وسەنگەری بەرخۆدان دان، بە هۆی رووداوی هاتووچۆ گیانی لە دەستداوە.
ئێوارەی رۆژی شەممە٢٠ی گەلاوێژ بەهارە قوربانی تەمەن ٩ساڵ و کچی جەهانگیر قوربانی و نەوەی کاک ڕەحمانی قوربانی بە هۆی رووداوی هاتووچۆ دڵە پەپوولەییەکەی لە لێدان کەوت و، کەسوکارو دۆستانی دێموکراتی تازیەبار کرد.
جێیوەبیرهێنانەوەی بنەماڵەی قوربانی بەتایبەتی کاک ڕەحمان قوربانی لە میژە لە رێزی تێکۆشەرانی دێموکرات دان و ، کاک ڕەحمان لە ئاوەدان هێشتنەوەی سەنگەری خەبات لە ناوچەی کامیاران و سنە و هەوشارو مەریوان، ناوێکی ئاشناو پێشمەرگەیەکی ناسراوە.
بنەماڵەی کاک ڕەحمان قوربانی چەند ساڵە نیشتەجێی وڵاتی ئاڵمانن و ئەندامی چالاکی حیزبی دێموکراتی کوردستانن.
بە پێی ڕاپۆرتێکی دیکە ، دوای بڵاو بوونەوەی هەواڵی دڵتەزێنی گیان لەدەستدانی بەهارە قوربانی کیژۆڵەی دێموکرات و ژیر و وریا ، بەشێک لە خزم وکەسانی بنەماڵەی قوربانی لە شاری کامیاران ویستوویانە ڕێورەسمی پرسەو سەرەخۆشی بۆ ئەو گوڵە جوانەمەرگە بەڕێوە ببەن، کە ناوەندە ئەمنیەتییەکان بە توندی رووبەڕوویان بونەتەوەو ڕێگرییان لێکردوون.
ڕاگەیاندنی حیزبی دێموکراتی کوردستان وێڕای دەربڕینی خەم وپەژارە بۆ پەڕپەڕ بوونی ئەو گوڵە باڵابەرزە ، کۆچی دوایی بەهارە قوربانی ، کە گولێک بوو بۆ بەهاری ئازادی، گەرمترین پرسەو سەرەخۆشی خۆی پێشکەش بە سەرجەم خەڵکی کامیاران، تێکۆشەرانی دێموکرات و، بەتایبەتی بنەماڵەی بەڕێزی کاک رەحمان قوربانی دەکاو، خۆی لە خەم و پەژارەیان بە بەشدار دەزانێ.
