سەرلەبەیانیی رۆژی سێ شەمە ٧ی ئاگۆست، هەیئەتێکی یەکیەتیی لاوانی دێموکراتی رۆژهەڵاتی کوردستان بەسەرپەرستی پێشەوا عەلی پوور سکرتێری گشتیی یەکیەتیی لاوانی دێموکراتی رۆژهەڵاتی کوردستان، بەشداریان کرد لە رێوڕەسمی کرانەوەی کۆنگرەی هەشتەمی یەکیەتی لاوانی دێموکراتی کوردستان لە هەولێر.
رێوڕەسمەکە سەرەتا بە سروودی نەتەوایەتی ئەی رەقیب دەستی پێکرد و پاشان بە وتاری بەڕێز تەیموور تەیموور عەبداڵ سکرتێری رێکخراو دەستی پێکرد، پاشان بەڕێز مەسعوود بارزانی سەرۆکی پارتی دێموکرات لە وتارێکدا باسی لە رۆڵی لاوان لە رابردوو و ئێستادا کرد و باسی لە ئاڵووگۆڕەکانی عێراق و باشووری کوردستان کرد، پاشان وتاری بەڕێز ساسان عەونی لە مەکتەبی رێکخراوە پیشەییەکان پێشکەش کرا. کۆمەڵێک بڕگەی هونەریش لە ناوئاخنی رێوڕەسمی کرانەوەی کۆنگرەدا پێشکەش کران.
شایانی باسە یەکیەتیی لاوانی دێموکرات پەیامێکی ئاراستەی کۆنگرە کرد و لەو پەیامەدا وێڕای جەخت کردنەوە لەسەر پتەو کردنی هاوپێوەندی نەتەوەیی لاوانی بەشە جیا جیاکانی کوردستان، دۆخی لاوانی هەر چوار بەشی کوردستانیان شی کردەوە.
