خاتوو مریەم ڕەزگەیی یەکێک لە خەمخۆرانی بزووتنەوەی ڕزگاریخوازانەی گەلەکەمان و، پاڵپشتی تێکۆشەرانی دێموکرات، دوای تەمەنێک ژیان بەسەر فەرازی، لە ناوچەی سەردەشت، ماڵاوایی لە ژیان کرد.
خاتوو مریەم هاوسەری حاجی قادر مەولانی ئەندامی هەڵسووڕی حیزبی دێموکراتی کوردستان، بە هۆی نەخۆشییەوە رۆژی ٧ی گەلاوێژ بە یەکجاری سەری نایەوە.
ئەو خاتوونە بەڕێزە لە ڕیزی ژنانی ئازاو بوێرە، کە لە مێژە ساڵە لە ئەوپەڕی خەمخۆرییەوە شانیان داوەتە ژێر کۆڵەکەی خەباتی گەلەکەیان و، چاونەترسانە لە تێکۆشەران و فیداکارانی دێموکرات بەتایبەتی لەساڵانی سەختی خەباتی چەکداریی پشتیوانیان کردووە.
خاتوو مریەم جیا لەوەی هاوسەرەکەی کە کەسێکی تێکۆشەر وخۆشناوە لە ناوچەی سەردەشت و، لە ئەندامانی بەوەجی شۆڕشی ٤٧/٤٦ بووە، بۆ خۆیشی خاتوونێکی نیشتمانپەروەر و دێموکراتدۆست بووەو بە هۆی ئازایەتی نواندنی لە حاند تێکۆشەران و فیداکارانی گەلەکەی، ناوێکی ئاشنایە بۆ کادرو پێشمەرگە دێرینەکانی دێموکرات.
شیاوی باسە ئەو ژنە تێکۆشەرە، بە هۆی هەڵسوکەوتی کوردانەو هەستی دایکانەی بەنیسبەت پێشمەرگە، لە ناوچەی سەردەشت کەسێکی جێگای ڕیزو حورمەت بوو.
ڕاگەیاندنی حیزبی دێموکراتی کوردستان ڕێز لە خەمخۆریی و وەفاداریی سەرجەم ژنانی تێکۆشەری وڵات دەگرێ و، بەم بۆنەوە خۆی لە خەمی لە دەستدانی خاتوومریەم، بە بەشدار دەزانێ و، پرسەو سەرەخۆشی خۆی پێشکەش بە سەرجەم کەسوکار و، بنەماڵەی خوالێخۆشبوو خاتوو مریەم ڕەزگەیی دەکا.
