تۆخبوونەوەی حزووری نیزامیی هێزە چەکدارەکانی ڕێژیم لە ناوچەی مەریوان

ناوەندە ئەمنیەتی‌و هێزە چەکدارەکانی کۆماری ئیسلامی لە ناوچەی مەریوان بە حزووریی بەرچاوی خۆیان کەشێکی ئەمنیەتییان لە ناوچەکەدا زاڵ کردوە.
بەگوێرەی هەواڵی کۆمیسیۆنی تەشکیلاتی حیزبی دێموکراتی کوردستان لە ناوچەی مەریوان کۆماری ئیسلامی بە ناردنی هێز بە چەکی قورس‌و نیوەقورس بۆ چەند ئاوایی لە ناوچەی مەریوان پەرەی بە جموجۆڵە نیزامییەکانی داوە.
ئەو ڕاپۆرتە دەڵێ کۆنە پایەگاکانی “توەسۆران”، “قامیشەڵە”، “وشکەڵان”، “گەوێڵە”، “بەردەڕەشە” و”دوپلوورە” لەو ماوەیەدا ئاوەدان کراونەتەوەو ئەو هێزو چەکانەیان تێدا جێگیر کراوە.
بڵاوبوونەوەی ئەو هەواڵە لە کاتێک دایە کە دوو ڕۆژ لەوە پێش پاكپوور، فەرماندەی هێزی وشكانیی سپای پاسداران له‌گه‌ڵ فەرماندەی سپای شاری شنۆ، سەردانی پایەگا سنوورییەكا‌ن و پایەگای كاوەی ئەم شارەی كردوه‌.
لە لایەكی دیكەوە پاش ناردنی كۆمەڵێك لە هێزەكانی لەشكرە زرێییەكانی سنەو كرماشان بۆ ورمێ‌و شنۆ، ستادی بەسیجی دوو پارێزگای ورمێ‌و سنە خۆیان بۆ بەڕێوەبردنی مانۆرێك ئامادە دەكەن.
شایانی باسە ئەم جموجۆڵانەی ئەرتەش و سپا و بەسیج، بەدوای حزووری به‌رچاوی هێزی پێشمەرگەی حیزبی دێمۆكرات لە ناوچە سنوورییەكانی “كێلەشین” هاتۆتە پێش‌و وه‌ک باس ده‌کرێ هێزەكانی كۆماری ئیسلامی، لەگەڵ خۆیان چەكی قورس و كەرستەی شەڕی جۆراوجۆر دەبەنە ناوچە سنوورییەكانی باكووری ڕۆژاوای ئێران.