پاش ١٠ رۆژ لە بێسەروشوێن بوونی خوێندکار و چالاکێکی مەدەنیی کورد، بەناوی “مریەم فەرەجی” تەرمی سووتاوی ئەو خوێندکارە بێتاوانە دۆزرایەوە.
پێشتر محەممەد حسێن ئاغاسی پارێزەری ئەو کچە خوێندکارە هەواڵی ئەگەر کوژرانی مەریەم فەرەجی لە تۆڕە کۆمەڵایەتییەکان بڵاو کردەوەو، رۆژی ٢٣ی پووشپەڕ هەواڵی کوژرانی چالاکی مەدەنیی کورد، مەریەم فەرەجی ٣٢ ساڵ و، خەڵکی سەرپێڵزەهاو پشتڕاست کرایەوە.
مریەم فەرەجی خوێندکارێکی کوردی خەڵکی سەرپێل زەهاو بوو ، کە مانگی بەفرانباری ساڵی ٩٦ی هەتاوی بە بۆنەی بەشداری لە خۆپیشاندانە سەرانسەرییەکاندا دەسبەسەر کراو ، بۆ ماوەی ١٠ ڕۆژ لە زیندانی ئێڤین ڕاگیراو، دواتر بە دانانی بارمتە بە شێوەی کاتی ئازاد کرا.
ئەو خوێندکارە کوردە لە لایەن دادگای کەرەج بە سێ ساڵ زیندانی تەعزیری و ٢ ساڵ قەدەغەبوون لەوەی کە بچێتە دەرەوەی ئێران، سزا درا.
ئەو خوێندکارە کوردە دەرۆژ لەمەوپێش ڕفێندراوەو لە شوێنی ڕاگرتنی هیچ زانیارییەک لە بەر دەستدا نەبوو، هەتا رۆژی شەممە ٢٣ی پووشپەڕ هەواڵی کوژرانی ئەو کچ کوردە بڵاو کرایەوە.
لە سەردەمی خۆپیشاندانەکانی بەفرانباری ١٣٩٦دا لانیکەم ٣٧٠٠ کەس دەستگیر کران و زیاتر لە ٢٢ کەس لە زیندانەکاندا، لە ژێر ئەشکەنجە و بە شێوەی جیاواز کوژران و ئەگەری ئەوەش زۆرە کە ئەو کچ خوێندکارە بەهەمان شێوە لە لایەن دەزگا ئەمنییەکانەوە کوژرا بێ.