گۆرانی لۆڕی و ئاشنا بە خەڵکی کوردستان بەناوی ” دایە دایە وەختی جەنگە” لە ڕیزی بەرهەمە هەرمان و بە بایەخەکانی ١٠٠ساڵی ڕابردوو، لە ڕێکخراوی فەرهەنگی یونسکۆ تۆمار کرا.
ئەو گۆرانییە بەسۆز و حەماسییە، کە دەگەڕێتەوە بۆ مووسیقی فۆلکلۆریکی لۆڕی، بە پێی تێکست و میلوودی باس لە ترژادیا و حەماسە خوڵقاندن دەکا و، هەر بۆیە لە ئاستی ئیران و بەتایبەتی لە کوردستان ئاوازێکی ناسراو و ئاشنایە.
ڕێکخراوی نێونەتەوەیی یونسکۆ گۆرانی “دایە دایە”ی وەکوو یەکێک لە جوانترین و بەبایەخ ترین مێلوودییە فۆلکلۆریکەکان ، لە ریزی بەرهەمە شیاوەکانی ١٠٠ساڵی رابردوو تۆمار کرد.
شیاوی باسە ناوەڕۆکی ئەو گۆرانییە باس لە خۆڕاگریی و کۆڵنەدانی خەڵکی لۆڕ و دانیشتووانی بناری زاگرۆس ، لە بەرانبەر ستەم و هێرشی زاڵمان و، فیداکاریی لە رێگای خاک و وڵات دەکا.
ئەو گۆرانییە فۆلکلۆریکە، ئەگەرچی لە لایەن چەندین گۆرانیبێژی لۆڕ و غەیرە لۆڕەوە خوێندراوەتەوە، بەڵام بە دەنگ وچریکەی بولبولی لۆڕستان “ڕەزا سەقایی” سۆزی تایبەتی هەیەو، بۆتە بیرەوەریی هاوبەشی خەڵکی لۆڕ و کورد و، تەنانەت نەتەوەکانی دیکە ئێرانیش.
