راگەیەندراوی ناوەندی هاوكاری بە بۆنەی ئەگەری ئیعدامی لاوێكی كورد خەڵكی بەشەرەفی كوردستان

ناوەندە مرۆڤ دۆست و پارێزەری مافەكانی مرۆڤ!
دەسەلاتی ڕەشی كۆماری ئیسلامی ئێران لە ماوەی 4 دەیەی رابردوو ، بەئامانجی كپ كردنی دەنگی ئازادیخوازانەی نەتەوەكەمان و بەردەوامی حوكمی نارەوای خۆی لە هەموو ئامرازێكی سەركووت و چەوسانەوە كەڵكی وەرگرتووە و خەراپترین و قێزەونترین جۆری سەركووت و جینایەتەكانی لەسەر میللەتەكەمان تاقی كردۆتەوە. گەلی كورد لە كوردستانی ئێران لە باری سەرژمێری و رێژەی ئیعدامی سیاسی لە سەرووی ریزبەندییەكاندایە و پۆل پۆل لاوەكانمان بە بیانوو و تۆمەتی ساختە و گالتەجار رەوانەی جووخەكانی مەرگ دەكرێن.
لە ئێستاشدا كە قەیرانە جۆراوجۆرەكان دەوران دەوری دیكتاتۆریەتی ئاخوندانیان گەمارۆ داوە و كێشە سیاسیە نێونەتەوەیی و ناوخۆییەكانیان رۆژ لەدووی رۆژ لەپەرەسەندن و گەورەبوونەوە دایە ، بێگومان زیاتر لە هەر كاتێكی تر ترسی تەقینەوەی رقی پەنگخواردووی گەلانی ئێرانیان لێ نیشتووە و بەو هۆیەشەوە رێژەی ئیعدام و سەركووت وەك رێگەكارێك بەمەبەستی چاوترسێن كردنی خەڵكی ئازادیخواز لە لایەن ئەو دەسەلات و سیستەمە ناخەڵكی و دژی ئازادییە زیادی كردووە .
لەدرێژەی تاوانەكانی رژیمی تاران لە راست گەلەكەمان ئەمجارە لاوێكی بێ تاوانی شنۆیی بە ناوی هیدایەت عەبدوڵلا پوور بە تۆمەتی بێ بنەمای هاوكاری هێزی پێشمەرگەی كوردستان كەوتۆتە بەر رقی ئاخوندانی خوێنرێژ. ناوبراو كە پێشتر لە بێدادگاكانی كۆماری ئیسلامی ئێران 30 ساڵ بەندینخانەی بۆ بڕابوویەوە، لە دوا پێداچوونەوە بە دەستێوەردانی سپای پاسداران حوكمەكەی گۆڕدراوە بۆ ئیعدام و لە ئێستاش دا مەترسی بەرێوەچوونی حوكمەكەی پەرەی سەندووە.
ناوندی هاوكاریی حیزبەكانی كوردستانی ئێران وێرای مەحكووم كردنی ئەو حوكمە ناعادیلانە ، سەرجەم ئازادیخوازان و ناوەندەكانی مافی مرۆڤ لە ئاستی نێونەتەوەیی بانگ دەكات تا دەنگی نارەزایەتی سەبارەت بەو جینایەتە هەڵبڕن و بە فشاری نێونەتەوەیی و هەمەلایەنە پێش بە ئیعدامە سیاسیەكان و ئیعدامی هیدایەت و رامینەكانی كوردستان بگرن.

ناوەندی هاوكاریی حیزبەكانی كوردستانی ئێران
6/7/2018