لە مانگی بەفرانباری ساڵی رابردوو کە شەپۆلێک ناڕەزایەتی لە دژی گەندەڵیی ماڵی و گرانی، لە شارەجیاجیاکانی ئێران دەستیپێکرد، ئێستاشی لەگەڵ بێ ئەو مانگرتن و هاتنە سەرشەقامی خەڵکی وەزاڵەهاتوو، لە سیستەمی کۆماری ئیسلامی بە شێوەی جۆراوجۆر هەربەردەوامە .
رۆژی دووشەممە ٢٨ی جۆزەردان لە شارەکانی تاران ، قوم ، ئەراک و، مەهاباد چینە جیاجیاکانی کۆمەڵگە، گردبوونەوەی ناڕەزایەتییان، لە هەمبەر دۆخی خراپی ئابووری و گرانی بەڕێوە برد.
رۆژی دووشەممە سینفی پێڵاوفرۆشەکانی بازاڕی تاران بەشێوەی بەربڵاو دەستیان دایە مانگرتن و، ڕاشکاوانە بە دژی کۆماری ئیسلامی و کەمتەرخەمیی بەرپرسانی ئەو نیزامە دروشمیان سەردا.
پێڵاوفرۆشەکانی بازاڕی تاران رووبە بەرپرسانی دەسەڵاتدار و خەمسارد، لە بەرانبەر دۆخی نالەباری ئابووریی وڵات، دروشمی” ئێوە دوژمنی ئێمەن، نەک ئامریکا”یان وتەوە.
هاوکات لەگەڵ ناڕەزایەتیی دەربڕینی کاسبکاران و دۆکاندارانی بازاڕی تاران ، بەشێک لە کارمەندو فەرمانبەرانی “سهام عدالت” لە بەردەم بینای وەزارەتی ئابووری ودارایی وڵات، بە هۆی دواکەوتنی حقووق ومووچەی ٣٩مانگەی خۆیان، کۆبوونەوەو، داوای مافی خۆیانیان کرد.
لە لایەک دیکەش ژمارەیەکی بەرچاو لە خاوەن نانەواخانەکانی شاری قوم، دژ بە گرانی و هەڵکشانی نرخی کەلوپەکان لە ئێران، گردبوونەوەی ناڕەزایەتییان پێکهێنا و، لەشاری “ئەراک”یش گردبوونەوەی هاوشێوە بەڕێوەچووە.
هاوکات لە گەڵ شارەکانی ئێران، لە کوردستانیش ئەمڕۆ دووشەممە ٢٨ی جۆزەردان کاسبکارانی تاناکۆڕای مەهاباد بازاڕیان داخست.
هەواڵەکان باس لەوە دەکەن کە بە هۆی داخستنی پاڕکینگی بازاڕی تاناکۆرا لە لایەن ناوەندە ئەمنییەکانەوە، کاسبکاران و دوکاندارانی بازاڕی تاناکۆڕا بە نیشانەی ناڕەزایەتی دەربڕین، مانیان گرت.
شیاوی باسە بازاڕی تاناکۆرای مەهاباد، کە بۆ هەموو شارەکان، بەکۆ لیباس ، هەنارەدەی بازاڕەکانی ئێران دەکا، داخستنی پاڕکینگی ئەو بازاڕە زەربەی لە گەشتیاریی مەهاباد داوەو، ئەمەش ناڕەزایەتی کاسبکارانی لێکەوتەوە.
