“فەرهەنگی زانستگەی کوردستان” کە کامڵترین و بێوێنەترین فەرهەنگی کوردییە پاش دەساڵ کار و توێژینەوە بە سەرپەرەستیی ماجید مەڕدۆخ ڕوحانی لە چواربەرگدا چاپ و بڵاو کرایەوە.
رۆژی سێشەممە ١٨ی بانەمەڕ بە ئامادەبوونی بەشێکی بەرچاو لە توێژەران و پۆسپۆڕان و قەڵەمبەدەستانی کورد لە ڕێوڕەسمێکی تایبەت لە زانکۆی سنە گەورەترین فەرهەنگی کوردی- کوردی / فارسی لە ژێرناوی ” فەرهەنگی زانستگەی کوردستان” پاش ١٠ ساڵ توێژینەوەی کارگرووپی، ناوەندی کوردستانناسی زانکۆی کوردستانی سنە ، پەردەی لەسەر لادرا.
ناوەندی کوردستانناسی لە ساڵی ٧٩ی هەتاوی بە شێوەیەکی زانستی دامەزراوەو دوای بەڕێوەبردنی دەیان و کۆڕ وسیمیناری زانستی ، ساڵی ٩٦ی هەتاوی مۆڵەتی تویژینگەی پێدراو، تا ئێستا ٣٥ کتێبی لە بوارە جیاجیاکاندا بڵاو کردووتەوە.
بە وتەی توێژەران “فەرهەنگی زانستگەی کوردستان” گەورەترین فەرهەنگی میژووی زمان و ئەدەبیاتی کوردییە کە لە ٩٣هەزار “دەروازە” (مدخل) ، ٨٦هەزار و ٨٣٦ لێکدراوی کرداری و ناویی جیاواز و، لە پێنج هەزار و ١٧١ چاوگ و ١٥ هەزار ٧٨٠ بەڵگە و نموونە پێکهاتووە و، ٢٦هەزار و ٨٠٨ سەرچاوەی هەیە.
لە کۆتایی ڕێوڕەسمی پەردە لادان لەسەر نایابترین فەرهەنگی کوردی ، چەند کەس لە توێژەران و هاوکارانی ماندوویینەناسی “فەرهەنگی زانستگەی کوردستان” خەڵات کران.
لە بەشێکی دیکەی ڕێوڕەسمەکەدا لە دکتۆر بەختیار سەجادی، ماجید مەردۆخڕۆحانی، مەهدی سەنەندجی، مەحیەدین کەریمی، محەمەدژیان ئەمینی یەدوڵا پەشابادی، وەک هاوکارانی ئەو فەرهەنگە هاوکارانی ئەو فەرهەنگ ڕێزیان لێ گیرا.
هاوکات چەندین کەسی دیکە وەک هاوکار و یارمەتیدەری ئەو فەرهەنگ ڕێزیان لێ گیرا و خەڵات کران.