کۆڵبەرێکی خەڵکی شاری پیرانشار، لە ئاکامی تەقەی هێزە چەکدارەکانی کۆماری ئیسلامیی ئێران، لە شاخی “کانی خوا”ی ئەو شارە پێکرا.
بەپێی هەواڵی سەرچاوە نێوخۆییەکان، شەوی ١٥ی بانەمەڕ لە ئەنجامی ڕاودوونان و تەقەی هێزە نیزامییەکان لە کۆڵبەران، کۆڵبەرێکی خەڵکی شاری پیرانشار بە ناوی “ڕەحمان تەفاخر” تەمەن ٤٥ ساڵ، بە تەقەی هێزە نیزامییەکان و بەربوونەوە لە شاخی “کانی خوا”ی ئەو شارە بریندار بووە.
یەکێک لە نزیکانی ناوبراو دەڵێ: ئەو کۆڵبەرە خێزاندار و ٤ منداڵی هەیە و دانیشتووی گەڕەکی “کۆنەخانێی شاری پیرانشارە.
ڕەحمان تەفاخر، لە شاخی کانی خوا لە ئاکامی ڕادوونانی چەکدارانی کۆماری ئیسلامیی ئێران گوللەی وەبەر لاقی ئەو کۆڵبەرە دەکەوێ لەو شاخە بەر دەبێتەوە و بە سەختی بریندار دەبێ و ئێستا لە نەخۆشخانەی شاری پیرانشار لە ژێرچاوەدێریی پزیشکی دایە تا ئامادەکرانی ئەو هەواڵە بارودۆخی جەستەیی زۆر خراپ نیە.
کاربەدەستانی کۆماری ئیسلامیی ئێران بەردەوام ئیدیعا دەکەن لە هیچ کام لە سنوورەکانی ڕۆژهەڵاتی کوردستان کۆڵبەر نەکوژراوە، لە حاڵێکدا ئەو قسانە دەکەن کە ڕۆژ نیە کەس یان کەسانێک لە سنوورەکانی کوردستان نەکوژرێن یان بریندار نەبن.
