کەسێکی خەڵکی یەکێک لە گوندەکانی شاری مەریوان کە نزیک بە ١٥٠ ڕۆژ لە دەسبەسەر کردنی لە لایەن هێزە چەکدارەکانی ڕێژیمی ئێرانەوە تێدەپەڕێ، بەڵام چارەنووسی هێشتا ناڕوونە.
بەپێی ڕاپۆرتی هیرانا، “تەحسین دادڕەس”، بەندکراوی کورد خەڵکی گوندی “سەردۆش”ی شاری مەریوان، کە ڕۆژی ٩ی سەرماوەزی ساڵی ١٣٩٦، لە لایەن هێزە ئیتلاعاتییەکانەوە دەسبەسەر کرا و ئێستا لە گرتووخانەی ئیدارەی ئیتلاعات لە شاری سنەدا چارەنووسی ناڕوونە.
یەکێک لە نزیکانی بنەماڵەی دادڕەس ڕایگەیاند: “تەحسین دادڕەس لە ماوەی کە دەسبەسەر کرانیدا، ئیزنی چاوپێکەوتنی لەگەڵ بنەماڵەکەیەوە و تەنانەت ئیزنی گرتنی پارێزەریشیان پێی نەداوە.
سەرەڕای چەند جار بەدواداچوونی بنەماڵەی ئەو زیندانییە کوردە بۆ ئاگاداربوون لە چارەنووسی کوڕەکەیان، هێزە ئەمنییەتییەکان لە دانی هەر چەشنە زانیارییەک خۆیان بواردووە”.
شایانی باسە ناوبراو ئێوارەی ڕۆژی ٩ی سەرماوەزی ساڵی ڕابردوو، لە لایەن هێزە ئیتلاعاتییەکان لە شاری مەریوان بە تۆمەتی هاوکاری لەگەڵ یەکێک حیزبە کوردییەکانی دژبەری کۆماری ئیسلامیی ئێران دەسبەسەر کرا.
