بە پێی هەواڵێک کە لە ناوچە کامیارانەوە بە دەستمان گەیشتووە، دایە ” وەجیهە خەمسە فیرووزی” دایکی شەهیدی فەرماندە کاک شاپووری فیرووزی بە هۆی نەخۆشی و بەساڵاچووییەوە ماڵاوایی لە ژیان کرد.
ڕۆژی پێنجشەممە ڕێکەوتی ٣٠ی خاکەلێوەی ١٣٩٧ی هەتاوی،دایکی فەماندەی شەهید “شاپوور فیرووزی” فەرماندەری هێزی بێستوون و یەکێک لە فەرماندەرانی بوێر وچاونەترسی دێموکرات، دوای تەمەنێک ژیان بەڕووسووری، کۆچی دوایی کرد.
ئەو خاتوونە بەڕێزە، بە وتەی ناسیاوانی یەکێک بووە لە ژنانی ئازا و دڵسۆزی ناوچەی کامیاران ، کە بە هۆی هەڵسوکەتی خەمخۆرانەو هەستی نیشتمان دۆستییەوە لە نێو خەڵکی ناوچەکە شیاوی ڕێز و حورمەت بوو، خەڵکی ناوچەی تێکۆشەری کامیارانیش بە حورمەتەوە لە ڕیوڕسمی ناشتن و سەرەخۆشییەکەی بەشدارییان کرد.
جێیوەبیر هێنانەوەیە کاک شاپوور فیرووزی فەرماندەی لێهاتووی هێزی بێستوون بۆ تۆڵەسەندنەوەی خوێنی ٥٩ لاوی مەهابادی، کە ئەو کات هێزی بێستون لەژێر فەرماندەیی ناوبراو بوو، ٥٩ عەمەلیاتی لە شارەکانی جیاجیاکانی کوردستان بە دژی سپای داگیرکەری ڕێژیم بەڕێوەبرد.
ئەو فەرماندە بەوەجە ڕێکەوتی ١٠ی جۆزەردانی ١٣٧١ی هەتاوی لە “قەڵاسەیدەی” ڕانیە سەر بە باشووری کوردستان تیرۆر کرا.
حیزبی دێموکراتی کوردستان وێڕای پێشکەش کردنی پرسەو سەرەخۆشی لە سەرجەم خەڵکی ناوچەی کامیاران ، بەتایبەتی کەسوکاری شەهید شاپوور، خۆی لە خەمیان بەشەریک و بەشدار دەزانێ.
