بە بۆنەی ١٠ی خاکەلێوە ساڵرۆژی لە سێدارەدانی یەکەم سەرۆککۆماری کوردستان پێشەوا قازی محەممەد و هاوڕێیانی کە ناوزەد کراوە بە رۆژی شەهیدانی کوردستان لە بنکەی سەرەکیی حیزبی دێموکراتی کوردستان ڕێوڕەسمێکی تایبەت بەو یادە بەرێوەچوو.
پاشنیوەڕۆی ڕۆژی پێنجشەممە ڕێکەوتی ٩ی خاکەلێوەی ٩٧ی هەتاوی لە ڕێوڕەسمێکی تایبەتدا یادی وناوی سەرجەم شەهیدانی رێگای ئازادی کورد و کوردستان، بەتایبەتی ڕێبەرانی شەهید، کرایەوە.
ئەو ڕێوڕەسمە سەرەتا بە ئامادەبوونی بەشێکی بەرچاو لە کادرو پێشمەرگەو ئەندامان و بنەماڵەکانی حیزبی دێموکراتی کوردستان لە مەزارگەی شەهیدانی دێموکرات، بە ڕاگرتنی خولەکێکبێدەنگی بۆ گیانی پاکی شەهیدان و هەروەها پێشکەش کردنی چەپکەگوڵی وەفاداری بەسەر گڵکۆی بەشێک لە شەهیدانی حیزب و گەل، لە گەڵ ئامانج و ڕێبازی سەرجەم شەهیدانی سوورخەڵاتی کوردستان پەیمانی وەفادارییان نوێ کردەوە.
لە بڕگەیەکی دیکەی ڕێوڕەسمی ١٠ی خاکەلێوەی ئەمساڵ کە لە یەکێک لە سالۆنەکانی بنکەی دەفتەری سیاسیی حیزبی دێموکراتی کوردستان بەڕێوەچوو، دوای سروودی ئەی شەهیدان، پێشکەشکار سەرگوڵ شەهبازی پێشەکییەکی تایبەت بەو بۆنەوە خوێندەوە.
پاشان خوشکە خدیجەی مەعزووری بەرپرسی کۆمیسیۆنی کۆمەڵایەتیی حیزب، بە بۆنەی ٧١مین ساڵیادی لە سێدارەدانی پێشەوا قازی محەممەد و هەڤاڵانی، پەیامی ئەوکۆمیسیۆنەی پێشکەش کرد.
لە بەشێک لە پەیامی کۆمیسیۆنی کۆمەڵایەتیی حیزبی دێموکراتی کوردستان، بە ئاوردانەوەیەک لە مێژووی خەبات و فیداکاری گەلی کورد، لە رۆهەڵاتی کوردستان و تێکۆشەران و پێشمەرگە خۆنەویستەکانی دێموکرات و بنەماڵە سەربەرز و رووسوورەکانیاندا هاتبوو: مەشغەڵی داگیرساو بە خوێنی شەهیدان ناکەوێتە عەرز تا ئەو رۆژەی پێشمەرگەو منداڵە خۆشی نەدیوەکانیان بە بزەی ڕەزا ، مزگێنی سەرکەوتن بە رووحی پاکتان دەگەیەنن.
ئێوە سەروەران ، لاپەڕەکانی مێژووی گەلی کورد و حیزبی دێموکراتتان بە خوێنی خۆتان نووسیوەو،سەنەدی ڕەوایی و بوونی گەلێکی خاوەن شووناس و پێناسەی خۆی مۆر کردوەو بۆ ئەبەد چەسپاندوە.
لە درێژەی پەیامی کۆمیسیۆنی کۆمەڵایەتیی حیزبی دێموکراتی کوردستان کە بە بۆنەی ١٠ی خاکەلێوە ئامادەکرابوو بە باسکردن لە سیاسەتی دژە کوردی کۆماری ئیسلامی و پەنابردن بۆ کوشتن و تیرۆر کردنی رۆڵە بەجەرگ و خەباتکارانی گەلی کورد هاتبووە:
کۆماری ئیسلامی نەتەوەیەک بەناوی کورد ناناسێ و نیزیک بە ٤٠ساڵە بە ئاشکرا کێشەو داخوازە ڕەواکانی گەلی کورد و کەمە نەتەوەییەکان و ئایینییەکانی دیکەی ژێر پێ خستووەو سیاسەتی هەڵاواردنی دژ بەوانی گرتووتە بەر، هەروەها نەتەنیا ئاور لە ویستی گەلێکی خاوەن مێژوو و شووناس ناداتەوە، بەڵکوو بە شێوە و ڕێگای جۆراوجۆرەوە ئینکاری هوویەتی کردوە و بێ حورمەتی بە داخوازییەکانی کردوەو، بۆ بەردەوامبوونی دەسەڵاتی نگریسیان فەرهەنگی ناحەز و دزیوی پەروردەی سیخوڕ و کورد بە کورد بە کوشتدانی کردوتە باو و ، فەزای کوردستانی ژەهراویی و تەماوی کردوەو زیندانەکانی لە مێرمنداڵان و رووناکبیران و چالاکوانانی سیاسی و مەدەنیی کورد ئاخنیوە.
دوای پەیامی کۆمیسیۆنی کۆمەڵایەتیی حیزب، لەلایەن کۆڕی هونەری حیزبی دێموکراتی کوردستانەوە سروودی “شەهید بەو زامەی درا لە جەرگت” پێشکەش کرا.
لە درێژەی ڕێوڕەسمەکە ، یەکێک لە پێشمەرگەکانی حیزب بەناوی هێمن کەریمی بە هاوکاری ئارام ئیزەدپەناهـ، و کوردستان عەزیزییان مەقامێکی تایبەت بە شەهیدانی بەناوی “وا بەهارە” پێشکەش کرد.
دوای وتنەوەی گۆرانی “مەڕۆ مەڕۆ بابە مەڕۆ” بە دەنگی خاتوو باوان کەریمی و بە هاوکاری کۆڕی هونەری حیزب، کاک ئەنوەر عەزیزییان پەخشانێکی پێشکەش بەو ڕێوڕەسمە کرد.
لە دوا بڕگەی ڕیوڕەسمی ٧١مین ساڵیادی شەهیدکرانی پێشەوا قازی محەممەد و هاوڕێیانی ، وەکوو نەریتی ساڵانی پێشوو بەشداربووان و میوانانی ڕێوڕەسمەکە، سەردانی ساڵۆنی ئارشیڤ و وێنەی شەهیدانی حیزبی دێموکراتیان کردو جارێکی دیکە لە گەڵ فیداکارانی گەل و شەهیدانی سوورخەڵاتی ڕێگای ئازادی کوردستان پەیمانی وەفا بە عەهد و درێژدانی ڕێگایان نوێ کردەوە.
