سەرەڕای هەبوونی کەشێکی ئەمنیەتی لە ناوچە جیاجیاکانی کوردستان ڕێوڕەسمی پێشوازی کردن لە ساڵی نوێ بەڕێوەچوو و هێشتاش لە هێندێک ناوچە هەر بەردەوامە.
لە یەکەم ڕۆژانی ساڵی ٩٧ی هەتاوی خەڵکی کوردستان بە پاڵپشتی و هاوکاری چالاکانی فەرهەنگی و مەدەنی ڕێووڕەسمی پێشوازی کردن لە نەورۆزیان بەڕێوەبرد.
بە پێی هەواڵ و وێنەکان خەڵکی شارو شارۆچکەو ئاواییەکانی کوردستان بە کردنەوەی ئاگرو هەڵپەڕکێی و لەبەر کردنی جلوبەرگی کوردی ، دیسیانەکە هەستی نەتەوەیی خۆیانیان بەرانبەر دەسەڵات دەربڕی و پێشوازییان لەو بۆنەکانی نەورۆز کرد.
هەروەها ناوەندە ئەمنییەکان کە حەوتێک پێش هاتنی ساڵی نوێ ڕێوشوێنی توندی ئەمنییەتییان گرت بەر و هەوڵیان دا کە ڕێوڕەسمی نەورۆز وەکوو ساڵانی ڕابردوو بەڕێوەنەچێ و هەرلەو پێوەندییەش دەستیان دایە بانگهێشت کردن و هەڕەشە کردن و دەسبەسەر کردنی چالاکانی مەدەنی و ڕێکخەرانی ئاهەنگی نەورۆز.
لە رۆژانی ڕابردوو دەیان کەس لە چالاکانی مەدەنی کە لە هەوڵی بەڕێوەبردنی ڕێوڕەسمەکانی نەورۆزیدا بوون، لەلایەن ناوەندە ئەمنیەتییەکانەوە بانگ کراون و ژمارەیەک لەوان دەسبەرن.
بەپێی ڕاپۆرتی چاونیوز دەیان کەس لە چالاکانی مەدەنی کە لە هەوڵی بەڕێوەبردنی ڕێوڕەسمی نەورۆز بوون لە ڕێگای جۆراوجۆرەو گوشاریان لەسەر خراوەو ژمارەیەک لەوان دەسبەسەر و هەڕەشەی توندیان لێکراوە.
هەر لەو پێوەندییەدا لە سنە ناوەندە ئەمنیەتییەکانی ئەو شارە و چەند شارێکی دیکەی کوردستان سەرەڕۆیانە و بێ بەڵگەی قانوونی لە دەزگای قەزایی دەیان کەس لە چالاکانی مەدەنییان بانگ کردوە و دەسبەسەریان کردوون.
موحسین ڕەزەوی، سدیق ڕۆستەمی، ئازاد لوتفیپوور، ڕامین ساڵحی، خەلیل منبەری، ئومید شێخی، جەلال خودامرادی، موسلیم سەعیدپوور، سەیران سەعیدپوور، مسلم سعید پور، عیرفان ساعیدپەنا و سالار کازمی ناوی چەند کەس لە چالاکانی مەدەنیی سنە و بۆکانن کە بانگ کراونەتە ناوەندە ئەمنیەتییەکان و بۆ ماوەی چەند سەعات لێپرسینەوەیان لێ کراوە.
شایانی باسە هەندێک لەو کەسانە دوای لێپرسینەوەی بازجووەکانی ئیدارەی ئیتلاعات بە شێوەی کاتی ئازاد بوون و ژمارەیەک لەوان وەک عیرفان ساعیدپەنا و سالار کازمی ئێستاش لە گرتنگەی ئیدارەی ئیتلاعاتی ڕاگیراون.
