بێ وڵام مانەوەی داوای كرێكارانی كەشت‌و سەنعەتی مەهاباد لەلایەن كاربەدەستانی دەوڵەتەوە

هیچ کام لە كاربەدەستان‌و ناوەندە حکومییەکان لە مەهاباد خۆی لە بەرامبەر داواو كێشە‌و گرفتەكانی كرێكارانی كەشت‌و سەنعەتی مەهاباددا، بە بەرپرسیار نازانێ.
كرێكارانی كۆڕی چوارگانەی سەوزی مەهاباد كە حەوتووی ڕابردوو، بە پشتبەستن بە بەڵێنیی خاوەن كار كۆتاییان بە مانگرتن‌و ناڕەزایەتییەکانیان لە بابەت دواكەوتنی مووچەی ١١ مانگەی خۆیان هێنابوو، ئێستا باس لە بەجێ نەگەیاندنی بەڵێنیی خاوەنكارەكەیان‌و وەرنەگرتنی مووچەكانیان دەكەن.
بەپێی ڕاپۆرتی هەواڵدەریی ئیلنا، لەدوایین ڕۆژی مانگرتنی ناڕەزایەتیی سینفیی كرێكارانی كۆڕی چوارگانەی سەوز ڕۆژی ١٨ی جۆزەردان، لە كۆبوونەوەیەكدا كە هەمان ڕۆژ بە ئامادە بوونی خاوەن كار و نوێنەرانی دەوڵەت، پێكهاتوو لە نوێنەری فەرمانداری و ئیدارەی كاری مەهاباد بەڕێوەچوو، بڕیار درا لانیكەم تا ڕۆژی پێنجشەممە ٢١ی جۆزەردان سەرجەم مووچە دواكەوتووەكانی٢٠٠ كرێكاری ئەم كۆڕە بدرێ، بەڵام تا ئێستاش ئەم بەڵێنییە جێبەجی نەكراوە.
كرێكاران وێڕای ئاماژە بەوەی كە كاربەدەستانی دەوڵەتیی بەشداربوو لەم كۆبوونەوەیەدا، بۆ گەرەنتیی بەڵێنیی خاوەنكار، چەكێكی ١ میلیارد تمەنییان لێ وەرگرتووە، دەڵێن بەهۆی شكاندنی بەڵێنیی ئەم خاوەنكارە ئێستا چاوەڕوانی بڕیاری كاربەدەستانی دەوڵەتن.
شایانی باسە ٢٠٠ كرێكار لە بەشە جۆراوجۆرەكانی كۆڕی سەوزی مەهاباد كە بریتییە لە “كەشت و سەنعەتی مەهاباد”، “كۆڕی ئاژەڵداریی و پیشەسازیی مەهاباد”، “مەجتەمەعی هما مورغی مەهاباد” و “ساردخانەی زمزمی مەهاباد” لە سەرەتای مانگی جۆزەردانەوە، بۆ ناڕەزایەتیی دەربڕین لە بابەت دواكەوتنی مووچەی ١١ مانگی خۆیان، مانیان گرتبوو.