قوباد تاڵەبانی، جێگری سەرۆک وەزیرانی حکومەتی هەرێمی کوردستان سەبارەت بە ڕووداوی تێرۆری قادر قادری، کادری بەوەجی حیزبی دێموکراتی کوردستان لە پەیامێکدا هاوخەمیی خۆی لەگەڵ حیزبی دێموکرات و بنەماڵەکەی دەربڕیوە.
دەقی پەیامەکە بەمجۆرەیە:
بەڕێز سکرتێر و ئەندامانی دەفتەری سیاسیی حیزبی دێموکراتی کوردستان!
بە داخ و پەژارەوە، هەواڵی تێرۆرکردنی فەرماندە و پێشمەرگەی حیزبی دێموکراتی کوردستان، کاک “قادر قادری”مان پێگەیشت. بەم بۆنە خەمناکەوە پرسە و سەرەخۆشیی خۆمان ئاراستەی حیزبەکەتان و کەسوکار و بنەماڵەی خوالێخۆشبوو دەکەین و هاوبەشی خەم و پەژارەتانین.
تێرۆرکردنی خوالێخۆشبوو هاوڕێ قادر، کادر و فەرماندەی لێوەشاوەی حیزبی دێموکراتی کوردستان مایە نیگەرانیی هەموو لایەکمانە. ئێمە وەک حکومەتی هەرێمی کوردستانیش دڵنیاتان دەکەینەوە هەموو لایەنە ئەمنیەکانمان ڕاسپاردووە کە بە زووترین کات ئەنجامدەرانی ئەو کردەوەیە دەستگیر بکەن و ڕادەستی دادگایان بکەن بۆ ئەوەی لێپێچینەوەی یاساییان لەگەڵدا بکرێت.
لە پەروەردەگاری مەزنمان داوایە گیانی خوالێخۆشبوو بە بەهەشتی بەرین شاد بکات، سەبووری و دڵنەواییش بە خانەوادە و خزمان و دۆستانی کۆچکردوو ببەخشێت. ئۆمێدەوارین ئەمە دواناخۆشیان بێ.
انا للە و انا الیە راجعون
قوباد تاڵەبانی
جێگری سەرۆک وەزیران
٧ی ئاداری ٢٠١٨
