پێشنیوەڕۆی رۆژی دووشەممە رێکەتی ١٤ی ڕەشەمە لە یەکێک لە سالۆنەکانی بنکەی سەرەکیی دەفتەری سیاسی حیزبی دێموکراتی کوردستان کۆڕیادێک بۆ ڕێزگرتن لە شەهید تالب بەساتیوەند، کە رۆژی ٧ی رەشەمە لە گرتووخانەی ئیتلاعاتی ئیلام شەهید کرا، بەڕێوەچوو.
ئەو ڕێوڕەسمە بە ئامادەبوونی بەشێکی بەرچاو لە کادر و پیشمەرگەکانی حیزب، سەرەتا بە سروودی “ئەی شەهیدان” و ڕاگرتنی خولەکێک بێدەنگی بۆ گیانی پاکی شەهیدان دەستیپێکرد.
دوای خویندنەوەی پارچەشێعرێک لە لایەن عەلی لەیلاخ پیشکەشکاری رێوڕەسمەکە، بەرپرسی کۆمیسیۆنی تەشکیلات کاک قادر وریا وتارێکی تایبەت بە جووڵانەوەکانی ئەم دواییانە خەڵکی ئێران و کوردستان و هەروەها سیاسەتی سەرکوتی کۆماری ئیسلامی پیشکەش بە ئامادەبووان کرد.
بەڕێزیان بە باس کردن لە هۆکاری ترس و دڵەڕاوکێی ناوەندە ئەمنیەکان و پەنا بردن بۆ کوشتنی لاوانی کورد، سەبارەت بە تازەترین شەهیدی حیزبی دێموکراتی کوردستان لە گرتووخانەی ئیتلاعاتی ئیلام چەند خاڵێکی گرینگی باس کرد.
هاوڕێ قادر وریا لە دریژەی قسەکانیدا بە هەڵسەنگاندنی پاریزگای هەستیاری ئیلام لە بواری فەرهەنگی و ئابوورییەوە لایەنە جیاجیاکانی بە کورتی باس کرد.
بەڕیزیان دواتر پەڕژایە سەر جووڵانەوەی شووناسخوازنەی خەڵکی ئیلام و شێوە ڕووبەڕوو بوونەوەی دەسەڵات و ناوەندە ئەمنیەتییەکانی باس کرد و شەهیدکردنی خویندکارێکی بواری پزیشکی بەناوی شەهید تالب بەساتیوەندی بە نموونە هێنایەوە و هەروەها بە وەبیرهێنانەوەی کوژرانی چەند لاوێکی دیکەی کورد بە دەستی جەللادەکانی ڕێژیم لە شارەکانی کرماشان وسنە، لەمانگی بەفرانبار تائێستا،لەگەل بنەماڵ و کەسوکاریان هاوخەمی کرد.
لە بڕگەیەکی دیکەی ئەو ڕێوڕەسمە ئەنوەر عەزیزییان شاعیری پیشمەرگەی پارچە شێعرێکی حەماسی پێشکەش کرد.
لە درێژەی ڕێوڕەسمی کۆڕیادی شەهیدتالب بەساتیوەند ، هاوڕێ شوڕش شەهباز بەرپرسی هەرێمی چواری کوردستان، سەبارەت بە ژیاننامەو بەسەرهاتی ئەوشەهیدە، کورتەیکی بۆ ئامادەبووان باس کرد و هەروەها ئاماژەی دا بە چالاکی و تێکۆشانی حیزبی دێموکراتی کوردستان لە پارێزگای کرماشان و ئیلام و، بە باس کردن لە سەر هەلومەرجی سیاسی و کۆمەلایەتی ئیلام، گرینگیدان بەو پارێزگایەی بە پێویست زانی.
لە بڕگەی کۆتایی ئەو ڕێوڕەسمە پەیامی یەکیەتیی نەتەوەیی خوێندکارانی کورد، لە لایەن ڕەحمان سەلیمی سکرتێری ئەو ڕێکخراوەیە خوێندرایەوە.
لە بەشێک لە پەیامی ئەو ڕێکخراوەیە بە سەرنجدان لە شێوەی هەڵسوکەوتی کۆماری ئیسلامی لەگەڵ خوێندکارانی ناڕازیی کورد هاتبوو: شههید کردنی ، خوێندکاری بهشی پزیشکی زانکۆی ئیلام له ژێر ئهشکهنجهی جهللادانی جهماران، وێڕای ئهوهی خهسارێکی گهورهیه بۆ کۆمهڵگای خوێندکاری له رۆژههڵاتی کوردستان، له ههمان کاتدا هاوبیران و هاوڕێیانی شههید تالب سوورتر دهکا لهسهر بهگژداچوونهوهی گهورهترین جههالهتی سهدهی 21 واته کۆماری ئیسلامی.
شیاوی باسە شەهید تالب بەساتیوەند، لاوی نیشتمانپەروەری کوردی خەڵکی ئیلام و ئەندامی تەشکیلاتی نهێنیی حیزبی دیموکراتی کوردستان، حەوتووی ڕابردوو لە ژێر ئازار و ئەشکەنجەی گرتووخانەی ئیتلاعاتی شاری ئیلام شەهید کرا
