بە پێی هەواڵێک کە لەشاری سەردەشتەوە بە دەستمان گەیشتووە، ڕۆژی ١١ی ڕەشەمە لە کاتێکدا شاخەوانی بەناوبانگی کورد، کەریم مەعروفزادە لەگەڵ پۆلێک لە شاخەوانانی دیکەی هاورێی لە تاران لووتکەی “توچاڵ” یان دەبڕی بە هۆی ڕاوەستانی دڵەوە گیانی لە دەست دا.
کەریم مەعروفزادە لە ساڵی ١٣٤٦ ی هەتاوی لە شاری سەردەشت لە دایکبووە و قۆناخەکانی خوێندنی بڕێوە و، وێڕای خوێندن حەزی لە وەرزش و یاری بووە و هاوکاتیش دوای تەواو بوونی خوێندن وەک مامۆستای قوتابخانە لە شاری سەردەشت وانەی بە قوتابیان گوتۆتەوە.
ناوبراو یەکێک لە شاخەوانە ناودار و چالاکەکانی شاری سەردەشت بووە و دواتر بە هۆی شارەزایی و لێزانی لە وەرزشی شاخەوانی، وەک سەرپەرەستی گرووپی شاخەوانی سینا هەڵدەبژێردرێ و دواتر ناوی سینا دەگۆردرێ و دەبێتە گروپی شاخەوانی ڕێژین.
ئەو وەرزشوانە سەرکەوتوو جیا لە کاری مامۆستایەتی و وەرزش، هاوکات لە باری ژینگە پارێزییەوە مرۆڤێکی چالاک و هەڵسوور بووە، گرووپی شاخەوانی سینا لە ڕێوڕەسمەکانی شەهیدانی شیمیابارانی هەڵەبجە و شاری سەردەشت و شیمیابارانی گوندی زەردەی کرماشاندا بەشدارییان کردووە و چالاکی جۆراوجۆریان نواندوە و هاوکاتیش بۆ کۆکردنەوە یارمەتی بە شەنگال و ڕووداوەکانی باشوور و بە تایبەت بە بەرکەوتووانی بوومەلەرزی ئەم دواییانەی کرماشان و ئیلام ڕۆڵی سەرەکی گێراوە. زۆرجار بە هاتنە سەر شەقام و کاری سیمبولیک توانیویانە کە کاری گەورە و خەڵک پەسەندانە بەرێوەبەرن.
شیاوی باسە ئەو وەرزشوان و ژینگەپارێزە سەرکەوتووە خاوەن هەستێکی نەتەوەیی و کوردپەروەرانە بووەو، بە هۆی هەڵسوکەوت و چالاکییەکانی لە نێو خەڵکی شاری سەردەشت دا خۆشەویست کرد بوو.
لە ١٣ ی مانگی ڕێبەندانی ئەمساڵدا و لە دوایین چالاکی خۆی و هاورێیانی شاخەوانی دا بۆ مەحکوومیەتی هێرشی تورکیە بۆ سەر عەفرین سەردانی چیاکانی سەرخیزان و سپیسەنگیان کرد و لەو بەرزایانەوە دەنگی پشتیوانی خۆیان گەیاندە عەفرین.
ڕاگەیاندنی حیزبی دێموکراتی کوردستان وێڕای پیشکەش کردنی پرسەوسەرەخۆشی بە کۆمەڵگەی وەرزشوانان وژینگەپارێزانی کوردستان، بەتایبەتی بنەماڵەی خوالێخۆشبوو کەریم مەعرووفزادە، خۆی لە خەمیان بە شەریک و بەشدار دەزانێ.
