لە رۆژانی ١١ و ١٢ی ڕێبەندانی ئەمساڵ ، بە ئامادەبوونی خەڵکێکی زۆر لە کوردستان و ئێران و تەنانەت گەشتیارانی بیانی، لە ژێر بارینی بەفر ڕێوڕەسمی کۆنی پیر شالیار کە بە”زەماوەندی پیرشالیار” ناسراوە، بە سەمای دەروێشانەو دەف لێدان بەڕێوەچوو.
ئەو ڕێوڕەسمە هەمووساڵێک لە وەرزی زستان و لە نێومانگی ڕێبەندان و درێژەی ئەو ڕێوڕەسمە لە وەرزی بەهار لە رۆژی ١٨ی بانەمەڕ لە ژێر ناوی ” کۆمسای” بەڕێوەدەچێ.
ڕێوڕەسمی پیرشالیار ، کە زیاتر لە ١٠٠٠ ساڵە مێژووی هەیە و هەمووساڵێک لە داوێنی سروشتی دڵڕەفێنی هەورامان بە بەشداری خەڵکێکی زۆر وەکوو نەریتێکی کۆن بەڕێوەدەچێ و سەرەنجی مێژووناسان و گەشتیاران ڕادەکێشێ.
مەزاری پیرۆزی “پیرشالیاری” لە هەورامانی تەخەت سەربە شارستانی سەوڵاوا لە پارێزگای سنەیە . خەڵکی هەورامان پیری شالیار بە پیر و موریدێکی خاوەن ڕزقی دەزانن و لە ڕێوڕەسمەکەیدا کە ناوی زەماوەندی پیری شالیارە بۆ ماوەی سێ رۆژ هەورامییەکان قوربانی دەکەن و شێعر و گۆرانی دەچڕن و بە دەف ژەنین ، سەمای عیرفانی ئەو نەریتە کۆنە بەڕێوە دەبەن.
مەزاری پیرشالیار کە دەگوترێ لە پێڕەوانی شێخ عەبدوڵقادری گیلانییە لە هەورامان تەخت دایە.
جێی ئاماژەیە مێژووناس مەلاعەبدولکەریم مودەڕس لە کتێبی “بنەماڵەی زانیاران ” دەڵێ: پیرشالیار لە سەدەی ٦ی هەتاوی لە هەورامانی تەخت ژیاوەو کەسێکی خواناس و جێگای ڕێز و خاوەن کەرامات بووە.
هەروەها لەو بارەوەی دەڵێ: پاشای شاری بوخارا کە کچێکی کەڕ وڵاڵی هەبووە بە ناوی “شا بەهارخاتوون ” ، کاتێک کە سەردانی هەورامانی کردوە چاک دەبێتەوەو دەبێت بە هاوسەری پیرشالیار و ، لەوکاتەوە خەڵکی هەورامان ڕێوڕەسمی “زەماوەندی پیر شالیار” بە شێوەی بەربڵاو بەڕێوە دەبەن.