پاش بوومەلەرزە گوماناوییەکانی پارێزگای کرماشان، لە ڕێکەوتی ٢١ی خەزەڵوەری ١٣٩٦ی هەتاوی، بەردەوام پاشلەرزەکانی ئەو بوومەلەرزەیە ئەو پارێزگایە دەهەژێنێ.
شەوی ٢٤ لەسەر ٢٥ی بەفرانباری ١٣٩٦ی هەتاوی، تەقینەوەیەکی مەزن لە ئەزگەلەی پارێزگای کرماشان و چەند شوێنێ دیکەی ئەو پارێزگایە هەژاند، بەڵام هەتا ئێستە سەرچاوە فەرمییەکانی ڕێژیم، لەسەر هۆکار و کاتی ئەم تەقینەوە هیچ ڕاگەیندراوێکیان بڵاو نەکردووەتەوە.
بەپێی هەواڵی گەیشتوو ، مەزنی و دەنگی تەقینەوەکە هێندە لە ئاستێکی سەرەوە بووە، ترس و دڵەڕاوکێی لە لای خەڵکی کرماشان دروست کردووە و تەنانەت هەتا مەودایەکی دووریش شووشە و پەنجەرەی خانووەکانی هەژاندووە.
هەر لەم پێوەندییەدا، شایەتحاڵان ڕایانگەیاندووە، پاش ئەم تەقینەوە مەزنە ڕووناکاییەک لە ئاسمانی کرماشان بینراوە و لە بەیانی هەمان شەودا خێرا هێزەکانی ڕێژیم بە هەلیکۆپتەری هەڵگری چەک قورس لە ناوچەکە جێگیر بوون.
پلەبەرزێکی ئاگادار لە شۆرای بەرزی ئاسایشی نیشتمانیی ڕێژیم، کە نەوێراوە ناوەکەی ئاشکرا بێت، بە هێندێ هەواڵدەریی دەرەکی ڕاگەیاندووە، کە لەو شەوەدا هێزەکانی سپای پاسداران کە بەنیاز بوون مووشەکێکی بالستیکی تاقی بکەنەوە، ئەو مووشەکە لە لانچێرەکەی خۆیدا تەقیوەتەوە و ئەو دەنگ و ڕووناکایییە بە هۆی تەقینەوەی ئەو مووشەکە بووە.
مەزنی تەقینەوەکە هێندە بەربڵاو بووە، کە کۆگاکانی مووشەکی بالستیکیی لە ناوچەی تەنگەکنش، لە گەمارۆی ئاگردا کەوتوون و هەردەم ئەگەری تەقینەوەیەکی گەورەتر لەو ناوچەیە چاوەڕوان دەکرێت، چوونکە شیمانە کراوە کە نزیک بە ٣ هەزار مووشەک لەو کۆگایانە پاشکەوت کراون، کە تەقینەوەی ئەم ڕێژەی مووشەکانە کارەساتێکی مرۆیی بەرین دەخولقێنێت.
هەر بەپێی وتەی ئەو سەرچاوەیە، لە کۆبوونەوەیەکی شۆرای بەرزی ئاسایشی نیشتمانی، کە لەم پێوەندییە گیراوە، هێندێ لە بەرپرسانی ڕێژیم پێشنیاری ئەوەیان کردووە، کە دۆخی نائاسایی ڕابگەیندرێت و خەڵک لەو ناوچەی نەمێنن و هەروەها ئەو مووشەکانە بۆ شوێنێکی دیکە بگوازرێنەوە، بەڵام محەممەد عەلی جەعفەری فەرماندەی سپای پاسداران لەگەڵ ئەم پێشنیارە دژایەتی کردووە و وتوویەتی: ڕاگەیاندنی دۆخی نائاسایی دەبێتە هۆی ئەوەی کە بنکە مووشەکییەکانمان بۆ ماهوارەکانی ئامریکا و ئیسرائیل ئاشکرا بکرێت و ئەگەری هێرشی خێرا و کتوپڕ بۆ سەر ئەم بنکە مووشەکییانە زیاتر دەبێتەوە.
جەعفەری هەر لەو کۆبوونەوەیەدا وتوویەتی: لە ئەگەری تەقینەوەی ئەنبارەکانی مووشەکی بالستیکی، زۆرەکەی چەند هەزار کورد دەکوژرێت، بەڵام لە کاتی گواستنەوە مووشەکەکان حەشارگەکەیان ئاشکرا دەبێت و بە دەستی خۆمان ئەنبارەکانمان پێشکەش بە ئامریکا و ئیسرائیل دەکەین.
