هێزە ئینتزامییەکان لە سنووری نێوان پارێزگای ورمێ و وڵاتی تورکیە تەقەیان لە ٣ کۆڵبەری کورد کرد کە لە ئاکامدا ٢ کەس کوژران و کەسێکی دیکەش بە سەختی بریندار بوو.
بەپێی ڕاپۆرتی سەرچاوە نێو خۆییەکان، ڕۆژی ڕابردوو، ٣ کۆڵبەری کورد خەڵکی ناوچەی سۆما و برادۆست سەربە شاری ورمێ، لە سنووری نێوان ورمێ و وڵاتی تورکیە بە تەقەی هێزە نیزامییەکانی حکومەت پێکران.
تا ئامادەکرانی ئەو هەواڵە لە ناوچەی سۆما و برادۆست ناوی ئەو ٢ کۆڵبەرە کوژراوەکەی بە ناوەکانی “م.ق” تەمەن ٢١ ساڵ و “الف ق” تەمەن ٢٠ ساڵ ڕاگەیاندراوە و شوناسی کۆڵبەرە بریندارەکە ئاشکرا نەکراوە.
بە وتەی هاووڵاتییانی دانیشتووی گوندی “کۆڕان” لە ناوچەی سۆما و برادۆست، هەتا ئێستا لەو بارەیەوە هیچ لێدوانێکیان لەسەر چۆنیەتی کوژران و برینداربوونی ئەو ٣ کۆڵبەرە کوردە بڵاو نەکراوەتەوە، بەڵام دەوترێ هیچ شتومەکێکیان پێ نەبووە و هێزە سنوورپارێزەکان بەبێ هۆ تەقەیان لێکردوون.
ئەو رووداوە لە حاڵێکدایە کە وەزیری ناوخۆی ئێران حەوتووی ڕابردوو ڕایگەیاندبوو، پیشەی کۆڵبەری نامێنێ و بۆ ئەو گوندانە هەتا ٥٠ کیلۆمێتری دەکەونە سەر سنوور، کارتی پیلەوەرییان بۆ دروست دەکرێ.
لەلایەکی دیکەش کاربەدەستانی کۆماری ئیسلامیی ئێران بەردەوام ئیدیعا دەکەن تا ئێستا هیچ کۆڵبەرێک لە سنوورەکان نەکوژراون و پێیان دەڵێن: قاچاخچی.
