تێکهەڵچوونی نێوان گریلاکانی پارتی کرێکارانی کوردستان و پێشمەرگەکانی حیزبی دێموکراتی کوردستانی ئێران لە ماوەیەک لەوەپێش، بۆ جارێکی دیکە برینەکانی شەڕی براکوژی لە ناو کورددا کولاندەوە. لە هەمان حال دا هەڵوێستی یەکگرتووانەی حیزبە کوردییەکان و بەتایبەتی حیزبەکانی رۆژهەڵاتی کوردستان و کوردستانیانی نیشتمانپەروەری هەر چوار پارچەی کوردستان لە بەرامبەر ئەو رووداوە تاڵەدا، جارێکی دیکە ئەو هیوایەیان بە هەمووان بەخشی کە کورد دەمێکە دەیهەوێ ماڵاوایی لە کەلتووری یەکلایی کردنەوەی کێشەکان بە رێگەی بەکارهێنانی هێزی چەکەوە بکا.
هەبوونی هێزی پێشمەرگەی حیزبی دیمۆکرات لەسەر سنوور بابەتێکی نوێ نییە، پێشتریش پێشمەرگەی ئەو حیزبە و تەنانەت حیزبەکانی دیکەی رۆژهەڵاتیش لە ناوچە سنوورییەکان حوزوورییان هەبووە و بوونی ئێستای ئەو هێزانەش، “نە هەڕەشەیە بۆ سەر بەرژەوەندیی هیچ حیزبێکی دیکە و نە پێشگیریو دژایەتی لە گەڵ ئەم جۆرە چالاکی و تێکۆشانەش، دەچێتە خانەی ئەرکێکی نەتەوەیی و نیشتمانی”.
با هەموانیش لەو راستییە بگەن کە هیچ حیزبێکی بەشە جیاجیاکانی کوردستان خاوەنی بێئەملاوئەولای ناوچەکانی سەرسنووری دەسکرد نین، کە بتوانن ئەو سنوورانە بە سەر هێزە شۆڕشگێرەکانی دیکەی کورددا دابخەن و ڕێگای هاتوچۆیان لێ ببڕن. ئەو ناوچانە هێندە بەربڵاو و بەرینن کە جێگای هەموو لایەنەکانیان تێدا دەبێتەوە و بەدڵنیایییەوە ڕێگاکانی پەڕینەوە بۆ رۆژهەڵاتیش زۆرن. ئەوەش سروشتییە کە هێزێک بۆی هەیە بنکە و شوێنە تایبەتییەکانی خۆی بپارێزێ و نەشهێڵێ خەڵکی دی هاتوچۆی پێدا بکەن، بەڵام ئەو مافەی نییە کە هەموو شوێنەکان بە پاوانی خۆی بزانێ و هێزەکانی دیکە ناچار بکا بە پێی ویست و مەیلی ئەو هەڵسوکەوت بکەن.
لە دەیەی شەست و حەفتای هەتاوی کاتێک حیزبی دیمۆکرات لەو سنوورە دەسکردانەوە هێزەکانی خۆی بەرەو قووڵایی رۆژهەڵاتی کوردستان دەپەڕاندەوە، رێژیمی ئیسلامیی ئێران دەیگوت ئەوانە نوێنەرایەتیی خەڵکی کوردستان ناکەن و بە پیلانی حکوومەتی بەعس عێراق و بۆ تێکدانی رەوشی ئەمنیی رۆژهەڵاتی کوردستان دێنەوە ئەمدیوی سنوور!. ئەمڕۆش کە حیزبی دیمۆکرات دەیهەوێ لە هەمان سنوورەوە بگەڕێتەوە بۆ ناو رۆژهەڵاتی کوردستان یان دەیهەوێ بنکە و بارەگاکانی لەو سنوورە نزیک بکاتەوە، بۆ هیچ لایەنێک رەوا نییە کە ئەوجۆرە جموجۆڵ و هەڵسووڕانە بە پیلان ناوزەد بکا و بڵێ ئەو هەنگاوە پیلانی فڵان وڵات یان هێزی دیکەی لە پشتە.
لە پەنا ئەوەشدا، هەموو حیزبە کوردییە نیشتمانپەروەرەکان دەبێ ئەوە بزانن کە گشت دەسکەوتەکانی هەر چوار پارچەی کوردستان، دەسکەوتی تێکڕای گەلی کوردە و نابێ بە سانایی بکرێنە قوربانیی چەند بەرژەوەندییەکی بەرتەسکی کاتییەوە و بەفیڕۆ بچن و، بەکورتی دەبێ هەموان پارێزگاری لە دەسکەوتە نەتەوەیییەکانی کورد بکەین.
هەرچۆنێک بێ، تێکهەڵچوون و گرژی و ناکۆکی لە نێوان هێزو لایەنە کوردییەکانی نێو بزووتنەوەی کورد، بەدڵنیایییەوە بە زیانبار بۆ بزاڤی رزگاریخوازی کورد تەواو دەبێ و خەساری قەرەبوونەکراوەی لێدەکەوێتەوە. هەر لەم سۆنگەیەوە، پێویستە کوردانی نیشتمانپەروەر لە سەرانسەری جیهان، یەکگرتووانە شەڕی براکوژی بەهەر بیانوو و پاساوێکەوە بە توندی مەحکووم و شەرمەزار بکەن و بەم هەڵوێستە لێبڕاوەیان کەشێک بخوڵقێنن کە هیچ لایەنێک ئەو جەسارەتە بە خۆی نەدا کە بۆ چارەسەرکردنی کێشەی سیاسی پەنا بۆ بژاردەی بەکارهێنانی چەک و زۆرملێیی ببا و بەم پێیە تەنیا رێگەی سیاسی و دیالۆگی ئاشتیانە بکرێتە چارەسەر و یەکلاییکەرەوەی کێشەکانیان، چونکە بەدڵنیایییەوە شەڕی براکوژی لە کۆتایی دا قارەمان و براوەی نییە.
