شەشەمین ڕێوڕەسمی فەرهەنگی ـ هونەریی “کەلتوور”، لە شاری مەریوان، بە بەشداریی هونەرمەندانی کورد بەڕێوە چوو.
بەپێی ڕاپۆرتی سرچاوە خۆجێیەکان، ڕۆژی ١٨ی سەرماوەزی ١٣٩٦ی هەتاوی، لە شاری مەریوان، بە بەشداریی هونەرمەندانی کورد، ڕێوڕەسمێک لەژێر ناوی بووژانەوەی فەرهەنگ و هونەری نەتەوەی کورد بەڕێوە چوو.
ئەم ڕێوڕەسمە کە لە هۆڵی زاگرۆسی شاری مەریوان بەڕێوە چوو، تێیدا هونەرمەندانێک لە شارەکانی کرماشان، ئیلام، مەهاباد، سلێمانی، هەورامان و مەریوان بە مەبەستی بووژانەوەی فەرهەنگ و نەریتی نەتەوەی کورد بەشدارییان کردبوو.
لە بڕگەکانی ئەم ڕێوڕەسمە هونەرمەندانی کورد، بەشێک لە داب و نەریت و کولتووری ناوچەی خۆیان بە بینەرانی بەشداربووی ئەو ڕێوڕەسمە پیشان دا.
شیاوی باسە لە شارەکانی رۆژهەڵاتی کوردستان مێهرەجان و ڕێوڕەسمە هونەرییەکان دەرفەتێکە بۆ وەگەڕ خستنەوەی هەستی نەتەوایەتی و هەروەها گرینگی دان بە کەلتووی و داب و نەریتی کوردەواری.
جێی ئاماژەیە شاری مەریوان یەکێک لە شارە پێشەنگ و سەرکەوتووەکانە لە بواری چالاکی فەرهەنگی و هەروەها خەباتی مەدەنی و هەرساڵە چەندین ڕێوڕەسمی گرینگی فەرهەنگی و هونەری لەوشارە بەڕێوەدەچی و لە لایەن خەڵک هونەردۆستی ئەوشارەش پێشوازی باشی لێدەکرێ.
