بە دەسپێشخەریی یەکیەتیی لاوانی دێموکراتی رۆژهەڵاتی کوردستان پلاتفۆرمی “وێران”، پلاتفۆرمێک بۆ لاوانی رۆژهەڵاتی کوردستان و بە مەبەستی هەڵسەنگاندن و گفتوگۆیەکی نوێ و ئەمرۆیانە لەسەر پرسە گرینگەکانی تایبەت بە رۆژهەڵاتی کوردستان یەکەمین کونفڕانسی خۆی لە ژێرناوی کۆنفڕانسی “ئاراستە ” بەڕێوە برد.
پاشنیوەڕۆی رۆژی یەکشەممە ڕێکەوتی ١٢ی سەرماوەز لە هوتێل چوارچرای شاری هەولێر بە بەشداریی بەشێک لە لاوانی رۆژهەڵاتی کوردستان و چەندکەس لە مێوانانی پارچەکانی دیکە، پلاتفۆرمی وێران لە ٥ پانێلی جیاجیا بۆ هەرکام لە بەڕێزان : خالید محەممەدزادە، حەسەن شێخانی، ژیوار ڕەسووڵی، مووسا باباخانی و عەلی لەیلاخ بەڕێوەچوو.
سەرەتای ئەو کونفڕانسە رۆژنامەنووس و چالاکی سیاسیی خالید محەممەد زادە یەکەم پانێلی لە ژێرناوی “رۆژهەڵاتی کوردستان و هۆوییەتی دزراو” لە چارەکە ساعاتێک پێشکەش بە ئامادەبووان کرد.
ناوبراو سەرەتا پێناسەیەکی لە خەباتی هۆوییەتخوازانەی گەلی کوردی لە رۆژهەڵاتی کوردستان باس کرد و دواتر لە درێژەی قسەکانی باسی لە کۆمەڵێک هەڵسوکەتی تاک و لایەنە سیاسییەکان کرد کە زیانی بەو هۆوییەتە گەیاندووە .
رۆژنامەنووس خالید محەممەدزادە لە میانەی بەشداری لە پلاتفۆرمی وێران بە دابەشكردنی دوو جۆر پشتگیری بۆ پارچەكانی دیكەی كوردستان لە رۆژهەڵاتەوە باسی لەوە کرد وەشوێنکەوتنی تاک یان لایەنی سیاسی وەدوای حیزبە دەسەڵاتدارەکان خەساری بە هۆوییەتی سیاسی رۆژهەڵاتی کوردستان داوەو بەڵام لە لایەک دیکەش پشتگیری كردنێكیتر لە رۆژهەڵاتەوە هەیە كە پشتگیری هاووڵاتییە كە ئەمەیان نەكەوتووەتە داوی حیزبەكان و پشتگیرییەكی نەتەوییە لەكوی پرۆسەی كوردبوون و، نابێ كوردایەتی لە پارچەكانی تر جێگەی كوردایەتی لە رۆژهەلات بۆ مرۆڤی رۆژهەڵاتی بگرێتەوەو مرۆڤی رۆژهەڵاتی سەرگەرم بكریت بە پارچەكانی دیكەوە تا ئەو ئاستەی رۆژهە ڵاتی كوردستان فەراموش بکا.
لە پانیلی دوویەم حەسەن شێخانی ئەندامی کۆمیتەی ناوەندیی حیزبی دێموکراتی کوردستان باسێکی لە ژێرناوی چۆنیەتی مامەڵەکردن لەگەڵ دۆخی هەنووکەیی پێشکەش کرد.
حەسەن شێخانی لە باسەکەی خۆیدا لە ڕوانگەیەکی ڕەخنەگرانە و بە پشتبەستن بە نموونەکانی بەرچاو لەسەر چۆنیەتی مامەڵە کردن لە گەڵ دۆخی هەنووکەیی رۆژهەڵاتی کوردستان پێداگریی کرد و لە بەشێک لە قەسەکانیدا وتی: رێگای مامەڵە کردن لەگەڵ دۆخی مەوجوود پەنا بردن بۆ رابردوو و چەقین لە رابردوودا نیە. دەبێ بە رویکەردێکی رەخنەیی مامەڵە لەگەڵ رابردوو بکەین و تەنیا ئەو چالاکییانەی رابردوو بۆ ئۆلگووبەرداری دەبن کە سەرکەوتوو بوون.
ناوبراو واقعبینی سیاسی بە خاڵێکی گرینگ و بە پێویست زانی و بە تەنیا ڕیگا بۆ دەربازبوون خوێندنەوەی رۆمانتیزمانە بۆ ڕووداوە سیاسییەکان لە قەڵەمدا و ، بۆ رووبەڕووبوونەوە لە گەڵ ئاڵۆگۆر و پێشهاتە سیاسییەکان وتی: رێگای مامەڵەکردن لەگەڵ دۆخی هەنووکەیی هەڵاتن بۆ پێشەوە و پەنا بردن بۆ قانوونی پێشکەوتن نیە؛ هەموو شتێک پێوەندی بە خۆمان و کۆی فاکتەرەکانەوە هەیە مومکینە ئەوەی ئەمڕۆ هەمانە سبەی لە دەستی بدەین و پێویستە بە میتۆدێکی دیکە مەنتقی ئاڵوگۆڕەکان هەڵسەنگێنین.
لە درێژەی یەکەمین کۆنفڕانسی پلاتفۆڕمی وێران، ژیوار ڕەسووڵی رۆژنامەنووس و چالاکی سیاسی پانێلێکی لە ژێرناوی “گوتاری سیاسی پارتەکان و جیلی چوارەمی دوای شۆڕشی گەلانی ئێران”ی بەڕێوەبرد.
ژیوار ڕەسووڵی بە خستنەرووی قوناخە جیاجیاکانی خەبات و بزووتنەوەی کورد لە رۆژهەڵاتی کوردستان، چەختی لەسەر گوتاری سیاسی پارتەکان و بەرەی چوارەمی دوای شۆڕشی گەلانی ئێرانی کرد.
ناوبراو لە بەشێک لە قسەکانیدا بە وەبیرهێنانەوە ١٠٠ رۆژی ڕابردوو لە رۆژهەڵاتی کوردستان و رووداوە ناوچەییەکان ، لەو پێوەندییەدا وتی: ئەوەی کە ئێستا دۆخی کورد لەرۆژهەڵاتی کوردستان بەرامبەر پارچەکانی دیکەی کوردستان خاووییەکی پێوەدیارە، هۆکارەکەی لاوازی و بێ ئیرادەیی لاوانی رۆژهەڵاتی کوردستان نیە، بەڵکو ئەو رووداوە ناوچەیی و جیهانیانەی کاریگەریان لەسەر باشوورو رۆژئاوای کوردستان داناوە، لە رۆژهەڵات رووینەداوە. لەرۆژهەڵاتی کوردستان هیچ دەرفەتێک لە ئەنجامی شەڕێک لەدژی ناوەند نەڕەخساوە. لاوانی رۆژهەڵاتی کوردستان هەم بەپرسیارەوە دەچنە ناو هەڵبژاردنەکان، هەم بۆ پشتیوانی لەکۆڵبەران دەچنە سەر شەقام و هەمیش پشتیوانییەکی گەورە لە گوتاری دەوڵەت-نەتەوە لە باشووری کوردستان و ریفراندۆم وەکوو دەرەنجامی ئەو گوتارە دەکەن.
لە پانێلی چوارەمی ئەو تلاتفۆرمە مووسا باباخانی ئەندامی ڕێبەری حدک بابەتێکی لە ژێر ناوی “کاریگەریی ئایین لەسەر پرسی نەتەوەیی لە رۆژهەڵاتی کوردستان”بەڕێوەبرد.
مووسا باباخانی بە باس کردن لە هەستیاریی ئایین لە رۆژهەڵاتی کوردستان و بەتایبەتی لەوناوچانە کە فرەچەشەنن، باسی لە کاریگەرییەکانی ئایین کرد لە مێژووی خەباتی کورد و پرسی نەتەوەیی لە رۆژهەڵاتی کوردستان کردو لەو بارەوە وتی:پرسی کورد پرسێکی نەتەوەییە چۆنکە کەلێنی ئەسڵی لە کوردستان کەلێنی نەتەوەیی نە دینی، هەر چەند کەلێنی دینیش هەیە چۆنکە ریژیم ستەمی نەتەوەییش لە کورد دەکا بەڵام کەلێنی ئەسڵی کەلێنی نەتەوەییە هە ربۆیە ئەو بزووتنەوە کە شکڵ و فۆرمی گرتووە لەسەر بنەمای ستەمی نەتەوەیی شکڵ و فۆرمێ گرتووە.
لە بەشیكی دیکە وتارەکەیان دا ناوبراو باسی ئەوەیان کرد کە کۆماری ئیسلامیی سیاسەتی ئامانجداری هەیە کە سیمایەکی ئایینی بە پرسی کورد بدا ئەویش سیمایەکی توندڕەوانە وەک سەلەفیەکان. هەر بۆیە بزووتنەوەی کوردستان دەبێ زۆر بە وریاییە هەڵس وکەوت لەگەل پرسی دین بکەن.
لە پانێلی کۆتاییدا رۆژنامەنووس عەلی لەیلاخ بابەتێکی لە ژێرناویی هەڵسەنگاندنی گوتاری نەتەوەیی لە رۆژهەڵاتی کوردستان پێشکەش کرد
ناوبراو لەسەرەتای قسەکانیدا بە باس کردن لە “نەتەوە” و میللەت وەکوو چەمکێکی مودێڕن لە جیهان ، لە جێگەوپێگەی ئەو بیرۆکەیە ئاوری لە گوتاری نەتەوەیی لە رۆژهەڵات دایەوە و کورتەیەک خەسارناسی بۆ کرد.
ناوبراو بە سەرەنجدان بە دۆخی رۆژهەڵاتی کوردستان بەتایبەتی دوای شەڕ و هێڕش بۆ سەر کوردستان لە سەروبەندی شۆڕشی گەلانی ئێران وتی: بۆ کورد لە رۆژهەڵاتی کوردستان دەرفەتێک باش هاتە ئاراوە هەتا هەنگاو بە هەنگاو بە ویستەکانی خۆی بگات، بەڵام بۆ شاردنەوە نابێ لەگەڵ یەک نەسازانی ئەحزاب و هەروەها لەمپەرسازکردنی لایەنە سیاسییەکانی دیکە ئەو دەرفەتەی لەبار برد و پەرش وبڵاویەکی لە گوتاریی نەتەوەیی لە رۆژهەڵاتی کوردستان بەرهەمهێنا.
ناوبراو جمۆجۆڵە فەرهەنگی و مەدەنی و سیاسییەکانی رۆژهەلاتی کوردستانی بە ویستێکی نەتەوەخوازانە و شکڵگرتنی شێوەخەباتێکی مەدەنیانەو جەماوەریی ناساند و هەوڵدان بۆ بە حیزبی کردنی چالاکییەکانی رۆژهەڵاتی بە خەسار و زیان زانی.
شایانی باسە لە دوای بەرێوەچوو هەر پانێلێک بەشداربووان پرسیارو ڕاو تێبینی خۆیانیان باس کرد، کە دواتر لەلایەن کۆڕگیڕانەوە وڵامدرانەوە.
